Րոպեում 1-ից ավելի զանգ: 2022 թվականի ապրիլին ստացվել է 112.886 զանգ՝ 2.5 տոկոսով ավելի նախորդ տարվա նույն ժամանակահատվածի համեմատ: Արտակարգ իրավիճակների նախարարությունն ամփոփել է մեկ ամսվա գործունեության արդյունքները:
Արսեն Սարոյան (ԱԻՆ ճգնաժամային կառավարման ազգային կենտրոնի պետի տեղակալ) - Երևան քաղաքում մենք գրանցել ենք շուրջ 55.000 զանգ, այս զանգերից մոտավորապես 4200-ը առնչվել են տեղեկատվական բնույթին, եղանակին, ճանապարհներին, երկրաշարժերին՝ կենցաղային բնույթով պայմանավորված: 1260 ահազանգ առնչվել է արտակարգ դեպքերին:
44 ահազանգ ապրիլին եղել է հոգեբանական բնույթի, քաղաքացիներին ցուցաբերվել է համապատասխան աջակցություն: 103 քաղաքացի էլ օգտվել է բժշկական սպասարկումից, հայտնում է Սարոյանը՝ հավելելով՝ զանգերի մեծ մասը պատահաբար է կատարվում:
Արսեն Սարոյան - 55.000 զանգերից շուրջ 47.400-ը ստացվել են քաղաքացիների կամ երեխաների կողմից՝ հեռախոսի SOS կոճակը պատահմամբ սեղմելուց կամ միտումնավոր, կեղծ ահազանգեր ուղղորդելուց: 911 օպերատորը շեղվում է իր հիմնական աշխատանքը կատարելուց, գերբեռնվում են հեռախոսագծերը, և արդյունքում օգնության կարիք ունեցող քաղաքացին հնարավոր է ուշ ահազանգի 911 համարին:
Ապրիլին գրանցվել է հրդեհի 488 դեպք՝ 11 տոկոսով ավելի, քան նախորդ տարվա ապրիլին: Հրդեհները հիմնականում աճել են տրանսպորտային միջոցներում, բուսածածկ տարածքներում և աղբանոցային վայրերում:
Արսեն Սարոյան - Ապրիլ ամսվա դեպքերի առանձնահատկություններից ելնելով` կուզեի ընդգծել պայթուցիկ սարքերի վերաբերյալ ահազանգերը, որովհետև ապրիլ ամսին ունեցել ենք այդպիսի 8 ահազանգ՝ հիմնականում մոլերի հետ կապված: Փրկարար ծառայության ուժերի միջոցով մենք տարհանել ենք 7602 քաղաքացու:
Փորձաքննության 240 պայմանագիր, արտադրական վտանգավոր օբյեկտներում 803 տեխնիկական անվտանգության փորձաքննություն՝ 802-ը՝ դրական, 1-ը՝ բացասական եզրակացությամբ: ԱԻՆ տեխնիկական անվտանգության ազգային կենտրոնն էլ իր գործունեությունն է ամփոփում:
Մարտին Ասլանյան (ԱԻՆ տեխնիկական անվտանգության ազգային կենտրոնի փորձագիտական լաբորատորիայի պետ) - Ապրիլին ունեցել ենք դժբախտ 2 պատահար, որից մեկը «Երազ» այգում զիփլայնից օգտվելու ժամանակ, մյուսը՝ Դավիթաշեն համայնքում՝ ամբարձիչը աշխատակցի վրա ընկնելու պատճառով:
Սեյսմիկ պաշտպանության տարածքային ծառայության տնօրենի զեկույցի համաձայն՝ 2022-ի ապրիլին լրացվել է 116 երկրաշարժի տվյալ, որից ամենաուժեղը՝ 4.2 մագնիտուդով, տեղի է ունեցել ապրիլի 8-ին Իրան-Թուրքիա սահմանային գոտում՝ Սալմաս քաղաքից 39 կմ հյուսիս-արևմուտք:
Հեղինակ` Էդուարդ Հովհաննիսյան