ՏԻՄ ընտրություններում ՀՀ մի շարք համայնքներում «Քաղաքացիական պայմանագիր» կուսակցությունն ամենաշատ ձայներ է ստացել և հաղթել է, սակայն այդ համայնքներում ընդդիմությունը միավորվել և իշխանություն է ձևավորել: Այս մասին այսօր կայացած առցանց ասուլիսում ասաց ՀՀ վարչապետ Նիկոլ Փաշինյանը՝ անդրադառնալով դիտարկմանը, թե ՏԻՄ ընտրություններում մի շարք համայնքներում ամենաշատ ձայն ստացած ուժերը չեն կարողացել ձևավորել իշխանություն, օրինակ՝ Վանաձորում քրեական գործ է հարուցվել Մամիկոն Ասլանյանի նկատմամբ:
«Եթե մեր քաղաքականությունն այն լիներ, որ մենք քրեական հետապնդումներով թույլ չենք տալիս, որ այդպիսի իշխանություն ձևավորվի, բոլոր տեղերում այդ նույն բանը կարտահայտվեր: Բազմաթիվ այլ տեղերում է ընդդիմությունը հաղթել՝ Կապանում, Տաթևում և այլն: Այդ քրեական գործերն ընտրությունների հետ կապ չունեն: Այսինքն՝ եթե մեկը մասնակցում է ընտրությունների, պետք է ինքն օրենքից վե՞ր լինի. իհարկե ո՛չ:
Ակնհայտ է, որ ՏԻՄ ընտրություններն անցել են ժողովրդավարության չափանիշներին համապատասխան: Ընտրություններում հաղթելը որևէ մեկին անձեռնմխելիություն չի տալիս, բացի օրենքով սահմանված դեպքերից»,- ասաց վարչապետը:
