Ֆինանսների նախարարության և «Ստանդարտ ընդ փուրզ» միջազգային վարկանշային գործակալության միջև համաձայնագիր է ստորագրվել, համաձայն որի այսուհետ գործակալության կողմից Հայաստանին սուվերեն վարկանիշ կշնորհվի: Այն բնութագրում է երկրի մակրոտնտեսական իրավիճակն ու ռիսկերը, օբյեկտիվորեն գնահատում տվյալ երկրի տնտեսությունը:
Ըստ «Արմբրոկ» ներդրումային ընկերության տնօրեն Արամ Կայֆաջյանի՝ տարբեր կազմակերպություններ և շահագրգիռ կողմեր ժամանակ առ ժամանակ ցանկություն են հայտնել «Ստանդարտ ընդ փուրզից» վարկանիշ ստանալ, սակայն խնդիր է առաջացել:
Արամ Կայֆաջյան, «Արմբրոկ» ներդրումային ընկերության տնօրեն - Եթե «Ստանդարտ ընդ փուրզը» տալիս է տվյալ երկրին վարկանիշ, ապա այդ երկրում գտնվող պետական և ոչ պետական՝ մասնավոր ձեռնարկություններն ավելի հեշտությամբ են կարողանում այդ վարկանիշը ցանկության դեպքում ստանալ, և իրենց ներդրումային գործունեությունն ու պլանները կառուցել այդ վարկանիշի շուրջ:
Աշխարհում կան բազմաթիվ վարկանշային կազմակերպություններ, որոնցից ամենախոշորներն ու ազդեցիկներն են «Ստանդարտ ընդ փուրզը», «Ֆիթչը» և «Մուդիսը», վերջին երկուսի կողմից Հայաստանն արդեն վարկանիշ ուներ:
Տնտեսագետ Արմեն Քթոյանի կարծիքով՝ այս համաձայնագիրը դաշտն ամբողջացնելու ուղղությամբ արված շատ կարևւոր քայլ էր:
Արմեն Քթոյան, տնտեսագետ - Չնայած ասում ենք, որ կան երեք վարկանշային ընկերություններ և երեքից մեկն է «Ստանդարտ ընդ փուրզը», բայց նրանցից յուրաքանչյուրն ունի իր գործունեության առանձնահատկություններն ու յուրահատկությունները: Այդ առումով, երբ որ երեքն էլ վարկանիշ են շնորհում տվյալ երկրին, նրանցից յուրաքանչյուրը, ճիշտ է, ունի իր ընդհանուր շուկան, բայց առանձին սեգմենտներ ևս ունի և, ըստ էության, այդ առանձին սեգմենտներին է միտված այս համաձայնագիրը:
Ըստ Արամ Կայֆաջյանի՝ այս վարկանիշավորումը ներդրումների տեսանկյունից մեծ խթան կարող է հանդիսանալ:
Արամ Կայֆաջյան - Ներդրողների տեսակետից՝ ավելի թափանցիկ և հասկանալի է դարձնում տվյալ երկրի տնտեսությունը: Այդ տեսակետից, իհարկե, կարևոր քայլ էր: Բայց պետք է պատկերացնենք, որ օտարերկրյա ներդրումների ներգրավման խնդիրները բազմազան են և բաղկացած են բազմաթիվ կոմպոնենտներից:
Արմեն Քթոյանը նշում է, որ շատ կարևոր է ունենալ կազմակերպություններ, որոնք ևս վարկանիշ ունեն, և ներդրողները, ի թիվս այլ գործոնների, կողմնորոշվեն նաև այդ վարկանիշներով:
Արմեն Քթոյան - «Ստանդարտ ընդ փուրզի» գործունեության նրբություններից մեկն ու կարևոր ուղղություններից մեկն առանձին առանձին կազմակերպություններին, այսինքն՝ միկրո մակարդակում վարկանիշների շնորհումն է: Դա մեր կազմակերպությունների համար ներդրումների կամ ներդրողների ներգրավման ավելի հեշտացված պայմաններ է ենթադրում:
Արամ Կայֆաջյանի խոսքով՝ ցուցանիշ ստանալը կարևոր է, բայց առավել բարդ է այն պահպանելն ու լավացնելը:
Արամ Կայֆաջյան - Դա պետք է իրականացվի տնտեսության զարգացման ճանապարհով, տնտեսական աճ ապահովելով և տարբեր ցուցանիշների վրա աշխատելով ու լավացնելով:
Ըստ Արմեն Քթոյանի՝ դրական վարկանիշ ունենալու համար շատ կարևոր է քաղաքական, տնտեսական և ֆինանսական կայունությունը:
Արմեն Քթոյան - Ամենատարբեր պարամետրեր կան, որոնք համադրելով ու նաև ապագային միտված որոշ կանխատեսումներ անելով՝ այս վարկանշային կազմակերպությունները գնահատական են տալիս, բայց ամեն մեկի մեթոդաբանությունը յուրահատուկ է և նաև ինչ-որ առումով առևտրային գաղտնիքի տարրեր է պարունակում:
Ֆինանսների նախարարության գնահատմամբ՝ «Ստանդարտ ընդ փուրզի» հետ համագործակցությունը հնարավորություն կտա համեմատաբար փոքր տեղական կազմակերպություններին օգտվել գործակալության վարկանիշավորման ծառայություններից, և կնվազեցնի մասնավոր հատվածի կազմակերպությունների՝ վարկանիշի ստացման ծախսերը:
