44-օրյա պատերազմի հետևանքով նյութական վնասներ կրած քաղաքացիներն Արցախում ֆինանսական պետական աջակցություն կստանան: Խոսքը հասարակական և արտադրական նշանակության շենքեր, մարդատար և բեռնատար ավտոմեքենաներ, շինարարական ու գյուղատնտեսական տեխնիկա, նյութական ակտիվներ, կաթնատու և մսատու կենդանիներ, մեղվաընտանիքներ, պտղատու այգիներ և խաղողի այգիներ ունեցողների մասին մասին է:
Մարատ Հասրաթյան (Արցախի կադաստրի և պետական գույքի կառավարման կոմիտեի նախագահի տեղակալ) - Հասարակական և արտադրական նշանակության շենք-շինությունների լրիվ կորստի դեպքում վնասը գնահատվում է կադաստրային արժեքի չափով, իսկ մասնակի կորստի դեպքում՝ կադաստրային արժեքի 50 տոկոսի չափով: Սակայն աջակցության չափը գնահատվում է վնասի և դրանց հետ կապված ծրագրով աջակցության չափի և դրա դրական տարբերությամբ, բայց ոչ ավելի, քան 100 միլիոն դրամի չափով:
Շենքի կամ շինության կադաստրային արժեքն անհամեմատ փոքր է դրա շուկայական գնից: Այս մասին հրավիրած խորհրդակցությանը հայտարարել է Արցախի նախագահը և հանձնարարել գործակից որոշել:
Արայիկ Հարությունյան (Արցախի նախագահ) - Երկու օր ձեզ ժամանակ, գործակից եք սահմանում, այսինքն՝ կադաստրային արժեք՝ եռապատիկ և քառապատիկ, որովհետև շատ է կադաստրային արժեքը ցածր:
Վնասները գնահատող պետական հանձնաժողովի աշխատանքային խմբերը հունիսի 1-ից Ստեփանակերտում ու Երևանում փաստաթղթեր են ընդունում ծրագրի շահառուներից: Օրական մոտ 100 դիմում է ստանում սպասարկման կենտրոնը:
Արմեն Հայրապետյան (աշխատանքային խմբի ղեկավար) - Ահագին քաղաքացիներ ունենք, ովքեր ՀՀ-ում են գտնվում այս պահի դրությամբ: Դրա համար ՀՀ-ում կա գործող նման խումբ, որը նույն գործառույթներ է իրականացնում: Այն գտնվում է Երևան քաղաքի Վարդանանց 11/1 հասցեում:
Իրավաբանական ֆակուլտետի ուսանող Աննա Գաբրիելյանը սպասարկման կենտրոնի աշխատակիցներից է: Անկեղծանում է՝ հեշտ գործ չէ, քանի որ գործ ունեն տեղահանված, վնասներ կրած քաղաքացիների հետ: Փորձում են օգնել, որ մարդիկ հեշտ հավաքեն փաստաթղթերը:
Աննա Գաբրիելյան (աշխատանքային խմբի անդամ) - Շատ ժամանակ է գնում բացատրական աշխատանքների համար, այսինքն՝ ինչ տեղեկանքներ պետք է ներկայացնեն, որտեղից: Քանի որ հիմնականում բարձր տարիքային խմբի քաղաքացիներ են մեզ մոտ հաճախում, մի փոքր խնդիրներ են առաջանում տեղեկանքների պարզաբանման ոլորտում, որ պետական կամ ոչ պետական հիմնարկն է ինչ տեղեկանք տրամադրում:
Մինչև 3 տարեկան 1 հեկտար պտղատու այգու դիմաց Արցախի կառավարությունը կհատկացնի 2 մլն դրամ, 3 և ավելի տարեկանի դեպքում՝ 3 մլն դրամ: Մինչև 3 տարեկան խաղողի այգու համար սահմանվել է 2,5 մլն դրամ պետական աջակցություն, 3 և ավելի տարեկան 1 հեկտար խաղողի այգու դիմաց՝ 3,5 մլն դրամ: Կենդանիների և մեղվափեթակների դեպքում թվերը միջինացված են:
Մարատ Հասրաթյան - Խոշոր եղջերավոր մեկ գլխաքանակ՝ 300 հազար դրամ, մանր եղջերավոր մեկ գլխաքանակ՝ 40 հազար դրամ: Այս ծրագրի մեջ նաև ընդգրկված են մեղվաընտանիքները: Մեկ մեղվաընտանիքի համար աջակցության չափը սահմանվել է 50 հազար դրամ:
Պատերազմի հետևանքով կորսված կամ վնասված տրանսպորտային միջոցների գնահատումը կկատարի լիցենզավորված կազմակերպություն:
