23/41 ընտրատեղամասում գրանցված 1440 ընտրողից արդեն իրենց քաղաքացիական պարտքը կատարել են շուրջ 250-ը: Տեղամասի հանձնաժողովի նախագահի գնահատմամբ՝ ընտրության մասնակցությունը միջին ակտիվության է:
Գոհար Գրիգորյան (23/41 ընտրատեղամասի հանձնաժողովի նախագահ) - Ընդհանուր մասնակցությունը նորմալ է՝ ոչ շատ ակտիվ, ոչ շատ պասիվ, համաչափ գալիս են, ընդհանուր առմամբ խաղաղ, հանգիստ ընտրություններ են:
Քաղաքացիները ընտրության կարգից հիմնականում տեղյակ են, օգնելու անհրաժեշտություն գրեթե չի առաջանում:
Գոհար Գրիգորյան - Շատ լավ, շատ տեղեկացված մարդիկ գալիս են, ասում են, որ դիտել են հեռուստացույցով, ձևերը գիտեն, շատ հանգիստ ընտրում են ու դուրս են գալիս, ոչ մի պրոբլեմ չի առաջանում, համենայնդեպս, դեռ չի առաջացել:
23/38 տեղամասում էլ վստահեցնում են՝ հակահամաճարակային կանոնները հնարավորինս պահպանում են, եթե քաղաքացին դիմակ չունի, ապա իրենք են տրամադրում, հերթերից էլ աշխատում են խուսափել:
Կարմեն Բաբայան (23/38 տեղամասի հանձնաժողովի նախագահ) - Դրսի հերթերում մենք զգուշացնում ենք, որ հեռու կանգնեն, ու աշխատում ենք էդ հերթերը շատ արագ անցնեն, որ կուտակումներ քիչ լինեն:
Նույն տեղամասում դիտորդական առաքելություն իրականացնող Հելսինկյան քաղաքացիական ասամբլեայի Վանաձորի գրասենյակի ներկայացուցչի խոսքով՝ մինչ այժմ նկատելի միակ թերությունը հանձնաժողովի հերթափոխի ժամանակ առաջացող կուտակումներն են, այլ թերացումներ չեն եղել:
Լիլիթ Գասպարյան (դիտորդ) - Մինչ այս պահը հիմնական խախտումը կուտակումներն են, որի պատճառը եղել է վիճակահանության ընթացքը, այսինքն՝ հանձնաժողովի անդամները իրենց պարտավորությունները փոխարինելու ընթացքում խախտել են ընտրության կարգը, այլ խախտումներ դեռևս չեն գրանցվել:
23/14 տեղամասում ցուցակների հետ կապված որոշ խնդիրներ են ունեցել, որոնք արագ շտկվել են:
Կարեն Քալաշյան (23/14 տեղամասի հանձնաժողովի նախագահ) - Ունենք մի երկու ցուցակային խնդիրներ, որոնք հեշությամբ շտկվում են, կապվում ենք անձնագրային բաժնի հետ: Ընտրատեղամասում շարժը ղեկավարելի է, կառավարելի է, չունենք ոչ մի միջադեպ:
Տարբեր ընտրատեղամասերում առաքելություն իրականացնող կուսակցությունների ու դաշինքների վստահված անձինք ևս շեշտում են՝ ընտրությունները խաղաղ են ընթանում, խախտումների դեպքերի չեն առնչվել:
Գարիկ Թամազյան («Պատիվ ունեմ» դաշինքի վստահված անձ) - 8:30-ից այստեղ եմ, ընթանում է նորմալ հունով, կուտակումներ չկան, որևէ խնդիր չի եղել մինչև հիմա:
Ռուզաննա Սահակյան (ՔՊ վստահված անձ) - Առավոտվանից այստեղ եմ, և ոչ մի սխալ չի եղել, ամեն ինչ նորմալ է:
Առավոտյան ժամը 8.00-ից Վանաձորի բոլոր ընտրատեղամասերի դռները բաց են, մարդկանց հոսքը բավական մեծ է, հիմնական խնդիրը կուտակումներն են, ինչը հանձնաժողովի անդամները փորձում են կարգավորել:
Հեղինակ՝ Տաթև Հակոբյան
