Միջազգային հանրապետական ինստիտուտը հարցում է անցկացրել 1502 քաղաքացու շրջանում՝ 2021 թ. ապրիլի 8-ից մայիսի 4-ի միջակայքում, հեռախոսազանգերի միջոցով, պատահական ընտրությամբ: Ըստ հարցման` վարչապետի պաշտոնակատար Նիկոլ Փաշինյանը Հայաստանում շարունակում է մնալ ամենաբարձր վարկանիշ ունեցող քաղաքական գործիչը: Հարցվածների 16 տոկոսը շատ «բարենպաստ» կարծիք ունի Փաշինյանի մասին, 29 տոկոսը՝ «բարենպաստ»։
Նախագահ Արմեն Սարգսյանի նկատմամբ վերաբերմունքը քաղաքացիների 3 տոկոսը գնահատել է «շատ բարենպաստ», իսկ 25 տոկոսը՝ «բարենպաստ»։
Հայաստանի բոլոր երեք նախկին նախագահներն ունեն ամենաբարձր հակավարկանիշը։ Բարձր հակավարկանիշ ունեցողների ցանկը շարունակում են նախկին վարչապետ Վազգեն Մանուկյանը, ԱԱԾ նախկին տնօրեն Արթուր Վանեցյանը, ԲՀԿ խմբակցության պատգամավոր Նաիրա Զոհրաբյանը։
Սերժ Սարգսյանի մասին հարցվածքների 49 տոկոսը «շատ անբարենպաստ» կարծիք ունի, իսկ 20 տոկոսը՝ «ինչ-որ չափով անբարենպաստ»։
Նիկոլ Փաշինյանի մասին հարցվածների 20 տոկոսն է «շատ անբարենպաստ» կարծիք հայտնել, ևս 13 տոկոսը «որոշ չափով անբարենպաստ» է համարել նրան:
Իշխանության ներկայացուցիչներից ամենաբարձր հակավարկանիշն ունի ԱԺ փոխխոսնակ Ալեն Սիմոնյանը։ Հարցվածների 52 տոկոսը երբեք չի լսել փոխվարչապետ Մհեր Գրիգորյանի մասին:
Հայաստանցիների 70 տոկոսը չի պատրաստվում հնարավորության դեպքում մեկնել այլ երկիր՝ մշտական բնակության: Ժամանակավոր աշխատանքի համար էլ արտերկիր մեկնել չի պատրաստվում հարցվածների 57 տոկոսը: 28 տոկոսը պատրաստ է ժամանակավորապես արտագնա աշխատանք անել:
Հայաստանում հարցվածների կեսն անկախ չի համարում Հայաստանի դատական համակարգը։ Հարցին, թե դատական համակարգը կախվա՞ծ է նախկին իշխանություններից, հարցվածների 40 տոկոսը պատասխանել է, որ լիովին կախված է, 39 տոկոսը պատասխանել է՝ մի փոքր կախված է, 6 տոկոսը՝ բոլորովին կախված չէ, 3 տոկոսը՝ մի փոքր կախված չէ։ 12 տոկոսը դժվարացել է հարցին պատասխանել։
Մյուս հարցին` դատական համակարգը կախվա՞ծ է արդյոք գործող իշխանությունից, հարցվածների 13 տոկոսը պատասխանել է, որ լիովին կախված է, 39 տոկոսը պատասխանել է՝ մի փոքր կախված է, 26 տոկոսը՝ բոլորովին կախված չէ, 8 տոկոսը՝ մի փոքր կախված չէ։ 14 տոկոսը դժվարացել է հարցին պատասխանել։
Խորհրդարանի արտահերթ ընտրությանն անպայման մասնակցելու է ընտրողների մեծամասնությունը, իշխող կուսակցությունը առաջատարն է ընտրողների նախապատվության ցուցակում: Միջազգային հանրապետական ինստիտուտի հրապարակած հարցման համաձայն՝ ՀՀ քաղաքացիների 26 տոկոսը հունիսի 20-ին կրկին կքվեարկի իշխող «Քաղաքացիական պայմանագիր կուսակցության օգտին: Հարցվածների 63 տոկոսը հունիսի 20-ին կգնա քվեարկության, ընտրություններին չի ցանկանում մասնակցել հարցվածների 14 տոկոսը, իսկ դժվարացել ու հրաժարվել է պատասխանել հարցվածների 11 տոկոսը:
Հարցման արդյունքներով Առաջին ալիքն ամենադիտելի հեռուստաալիքն է։ Բոլոր լրատվամիջոցներից քաղաքական տեղեկատվության համար հարցվածների 12 տոկոսը նախընտրում է Առաջին ալիքը, որն առաջարկված ընտրանքների ցանկում ամենաբարձր ցուցանիշն է։
Կառավարության գործունեությունից դժգոհ քաղաքացիների 14 տոկոսի և գոհ քաղաքացիների 16 տոկոսի համար տեղեկատվության ստացման հիմնական աղբյուրն Առաջին ալիքն է։
Հարցման մասնակիցների կարծիքով՝ Հայաստանի բարեկամ երկրների եռյակի առաջին տեղում Ֆրանսիան է, այնուհետև՝ Ռուսաստանը և ԱՄՆ-ը: Հարցումն իրականացնողները նշում են՝ վիճակագրական սխալի չափը չի գերազանցում 2.5 տոկոսը:
