Վարչապետի պաշտոնակատար Նիկոլ Փաշինյանի այսօրվա օրակարգում «Քաղաքացիական պայմանագիր» կուսակցության համակիրների հետ հանդիպումն էր: Աջափնյակ վարչական շրջանում Փաշինյանը քաղաքացիներին ասել է՝ պատերազմից խուսափել հնարավոր չէր: Իր խոսքում Փաշինյանն առանձնացրել է Հայաստանի 3 նախագահների դիրքորոշումները Լեռնային Ղարաբաղի հարցի կարգավորման շուրջ:
Նիկոլ Փաշինյան, ՀՀ վարչապետի պաշտոնակատար - Օրինակ` Լևոն Տեր-Պետրոսյանը ներկայացնում է, թե Ղարաբաղի հարցով այս էր վիճակը, այն էր վիճակը, բայց չի ձևակերպում, թե Ղարաբաղի հարցի իր պատկերացումը որն է: Իսկ իր ասածն էր, որ մենք Ղարաբաղն ամբողջությամբ պետք է տանք Ադրբեջանին և հանգիստ ապրենք:
Փաշինյանի խոսքով՝ Բաթումիի ու Ալեքսանդրապոլի պայմանագրերն ստորագրող ուժն իրավունք չունի այսօրվա իշխանություններին դավաճան անվանել: Հիշեցնում է Ստամբուլում՝ Ռոբերտ Քոչարյանի մասնակցությամբ, Եվրոպայի անվտանգության խարտիային կողմ քվեարկելու փաստը:
Նիկոլ Փաշինյան - Գրված էր, որ Ղարաբաղի հարցը կարող է լուծվել Ադրբեջանի տարածքային ամբողջականության շրջանակում: Դե եթե Թուրքիայի գործակալ լիներ 98-ին ՀՀ ղեկավարը, ուրիշ ավելի մեծ ի՞նչ ծառայություն պետք է մատուցեր, քան Ղարաբաղին բանակցություններից դուրս թողնելը:
Փաշինյանի պնդմամբ՝ Շուշիի հարցը միշտ էլ եղել է բանակցությունների օրակարգում՝ 99-ից մինչև 2018 թվականների բոլոր փաստաթղթերում:
Նիկոլ Փաշինյան - Վերջերս հրապարակված թղթում, որտեղ Մեղրիի փոխանցման ծրագիրն էր քննարկվում, գրված է, որ Լեռնային Ղարաբաղը, Շուշիի շրջանը և Լաչինի շրջանը փոխանցվում է Հայաստանին, ձևակերպմանն ուշադրություն դարձրեք. ԼՂԻՄ տարածքը՝ ստորակետ, Շուշին՝ ստորակետ, Լաչինի շրջանը՝ վերջակետ երևի: Ի՞նչն է հետաքրքիր՝ Շուշին առանձնացված է ԼՂ-ից և դրված է Լաչինի հետ համարժեք կարգավիճակում, և մեզ շատ ներկայացուցիչներ ասում են՝ Շուշիի հարց չի եղել:
Այդ նույն փաստաթղթում, որը բանակցվում էր Քոչարյանի պաշտոնավարման շրջանում, այս ձևակերպման հետ միասին կա նաև անկլավներ ձևակերպումը՝ շարունակում է Նիկոլ Փաշինյանը: Որպես փաստ ներկայացնում է 2013 թվականին նախագծված Հյուսիս-հարավ ճանապարհի ուղին:
Նիկոլ Փաշինյան - Հիմա տպավորություն են ստեղծում, որ դավադիր իշխանությունը գնացել, մտածել է՝ էլ ի՞նչ կա, որ տա Ադրբեջանին: Հյուսիս-հարավ ճանապարհը նախագծվել է 13 թվականին: Փաստաթղթային ապացուցվող բան է՝ Արտաշատ - Եղեգնաձոր հատվածը ՀՀ ոչ կապիտուլյանտ իշխանությունը նախագծել է հետևյալ կերպ. ճանապարհը, որ գնում է մեր իմացած ճանապարհով, չի գնում, հասնում Երասխ, հետո բարձրանում Պարույր Սևակ և Տիգրանաշեն, այլ գալիս է, մտնում Վեդի, Ուրցաձոր և դուրս է գալիս Զանգակատան տակ: Այսօր, մոտավորապես, այնքան տարածք, որքան Խորհրդային Հայաստանից կա Ադրբեջանի տիրապետության տակ, մոտավորապես այդքան էլ կա Հայաստանի տիրապետության տակ: Մի վախեցրեք մեզ այդ թեմայով:
Սեղանին ոչ մի գաղտնի փաստաթուղթ չկա՝ վստահեցնում է Փաշինյանը: Հավելում՝ իրեն հորդորում են նախկիններին չմեղադրել, բայց հիմա նախկիններն են իրեն մեղադրում:
Նիկոլ Փաշինյան - Հիմա տեղեկանում ենք, որ Ռոբերտ Քոչարյանն ու Լևոն Տեր-Պետրոսյանը թաքուն զանգում են՝ ոնց ես, ինչ ես, կարող է այդ կապը միշտ է եղել, մենք չենք իմացել: Մարտի 1-ին ասում էր՝ ինձնից բացի թող ոչ մի զոհ չլինի, հետո զանգում էր, ասում՝ Ռոբերտ ջան, տես ինչ զոհ կարող ես էլի գտնել:
Դավթաշենի նախընտրական շտաբում համակիրների հետ հանդիպմանը վարչապետի պաշտոնակատարը սահմանային ընթացիկ վիճակին է անդրադառնում, վերահաստատում է՝ պատերազմ թույլ չեն տալու, խնդիրն այսօր դիվանագիտական ճանապարհով պետք է լուծվի:
Նիկոլ Փաշինյան - Երեկ առաջարկն արել եմ, որը մտնում է մեր տրամաբանության մեջ: Մենք ասում ենք՝ սահմանագծից զորքերը հեռանում են, միջազգային դիտորդներ են գալիս, իրականացվում է սահմանագծում: Ասում են՝ մեզ դեմարկացիա պետք չէ:
Հաջորդ կանգառն Արաբկիրի շտաբում էր: Համակիրների հետ հանդիպմանը Փաշինյանը մեջբերում է ընտրությունների կազմակերպման վերաբերյալ ընդդիմադիրների պնդումները:
Նիկոլ Փաշինյան - Ասում են՝ այս իշխանություններն ընտրությունները կեղծելու բարոյական ռեսուրս չունեն: Սա ամենամեծ գնահատականն է, մենք իրենց նման անբարոյական չենք: Այս իշխանությունն ընտրություններ կեղծելու բարոյական ռեսուրս չունի, որովհետև մեր բարոյականության մեջ ընտրություն կեղծելը չի մտնում և այս իշխանությունն ընտրություն կեղծելու կարիք չունի: Մենք ենք կազմակերպել ընտրությունները, եթե կառչած ենք իշխանությունից, ինչի՞ ենք կազմակերպել: Ով էլ ընտրվի, ընտրությունները չեն կեղծվելու:
Վարչապետի պաշտոնակատարի խոսքով՝ 3 տարիների ընթացքում՝ բանակից մինչև տնտեսություն, մեծածավալ բարեփոխումներ են եղել, որը եթե արվեր վերջին 30 տարում, Հայաստանն ու կյանքն այս երկրում այլ որակի կլիներ: Կրկին անդրադառնալով Ղարաբաղի հարցին՝ Փաշինյանը վստահեցնում է՝ անկյունաքարային խնդիրներից մեկն այն էր, որ Ղարաբաղը դուրս մնաց բանակցություններից: Եվ Մեղրին հանձնելու հարց քննարկվում էր 99-ին, ոչ թե հիմա՝ ընդգծել է Նիկոլ Փաշինյանը:
Նիկոլ Փաշինյան - Սյունիքը տալիս է, միջանցքը տալիս է, դուք եք այդ փաստաթուղթը ձևակերպել, տվողը դուք եք, մենք երբեք Մեղրի, միջանցք, այդպիսի հարցեր չենք քննարկել որևէ մեկի հետ: Այո՛, եղել է այդպիսի թեմա, եղել է նաև նոյեմբերի 9-ի փաստաթղթի ստորագրման ժամանակ: Ես կարող եմ ապացուցել, որտեղ անհրաժեշտ է, ես ասել եմ՝ բացառված է, ես այդպիսի թուղթ չեմ ստորագրի և դա հանվել է:
Փաշինյանը խոսել է նաև գերիների, նրանց վերադարձի հետ կապված աշխատանքների մասին: Վարչապետի պաշտոնակատարը վստահեցնում է՝ սա ժամանակի հարց է, Ադրբեջանի ղեկավարությունն այսկերպ փորձում է վրեժ լուծել:
Նիկոլ Փաշինյան - Ընտրությունների հետ կապված որոշակի տրամաբանություն կա: Ես համոզված եմ, որ ընտրություններից հետո, չգիտեմ ինչ չափով կկարողանանք հարց լուծել, բայց կինտենսիվանա գործընթացը, որովհետև գերիների գործոնը և այս մյուս գործոնն օգտագործում են Հայաստանում ընտրությունների արդյունքների վրա ազդելու համար: Նաև դա է պատճառը, որ չեն վերադարձնում:
Նիկոլ Փաշինյանը համակիրների հետ է հանդիպել նաև Նոր Նորք վարչական շրջանում:
