Երեկ երեկոյան փակման գալա համերգի ընթացքում հայտարարվել են Արամ Խաչատրյանի անվան 16-րդ միջազգային մրցույթի հաղթողների անունները։ Առաջին մրցանակի է արժանացել Դիանա Ադամյանը (Հայաստան)‚ երկրորդ մրցանակը ստացել է Մայքլ Գերմերը (Դանիա)‚ իսկ երրորդ տեղը զբաղեցրել են Լորենց Կարլսը (Շվեդիա) և Բելլ Թինգը (Թայվան)։ Դափնեկրի դիպլոմ է ստացել Ֆելիքս Հարությունյանը։
Շնորհվել են նաև մի շարք հատուկ մրցանակներ. «Յոհան Սեբաստիան Բախի Մենանվագ ջութակի համար ստեղծագործության լավագույն մեկնաբանություն» (1-ին փուլ) անվանակարգում հատուկ մրցանակ է ստացել Դիանա Ադամյանը‚ «Նիկոլո Պագանինիի Կապրիսի լավագույն մեկնաբանություն» (1-ին փուլ) անվանակարգում մրցանակ է ստացել Մայքլ Գերմերը‚ «Լյուդվիգ վան Բեթհովենի ռոմանսի լավագույն մեկնաբանություն» (1-ին փուլ) անվանակարգի հաղթող է ճանաչվել Լորենց Կարլսը։ «Արամ Խաչատրյանի Երգ պոեմի լավագույն մեկնաբանություն» (1-ին փուլ) անվանակարգում լավագույնը Բելլ Թինգն է։ «Արամ Խաչատրյանի Պարի լավագույն մեկնաբանություն» (2-րդ փուլ) անվանակարգը շնորհվել է Դիանա Ադամյանին։ «Հանդիսատեսի համակրանք» անվանակարգին արժանացել է Բելլ Թինգը‚ այս անվանակարգում հաղթողն ընտրվել է առցանց քվեարկության միջոցով‚ նա 2021-2022 համերգաշրջանում Հայաստանի պետական սիմֆոնիկ նվագախմբի հետ ելույթ ունենալու հնարավորություն կունենա։ 2020 թ. «Գրեմիի» նոմինացված PARMA Recordings ձայնագրման ստուդիան Խաչատրյանի անվան 16-րդ միջազգային մրցույթի առաջին մրցանակակրին տրամադրելու է հատուկ մրցանակ՝ 25000 ԱՄՆ դոլարին համարժեք պայմանագիր։ Ձայնագրությունները կթողարկվեն PARMA Recordings ստուդիայի կազմում գտնվող Navona Records լեյբլի ներքո։
Փակման գալա համերգին տեսակապով իրենց ուղերձներն են հղել մրցույթի ժյուրիի անդամները։ Սանտանդերի երաժշտության և ակադեմիայի ժողովի գեղարվեստական ղեկավար Պիտեր Չաբան‚ անդրադառնալով Խաչատրյանական մրցույթին‚ նշել է‚ որ 2020 թ. մարտահրավերների պայմաններում մեծ սխրանք էր անցկացնել մրցույթը‚ ինչը հնարավորություն տվեց‚ որպեսզի երաժշտությունն իր բարերար ազդեցությունն ունենա մարդկանց վրա։ Նա նաև ընդգծել է Արամ Խաչատրյանի մեծ ճանաչումն աշխարհում։
Մադրիդի Ռինա Սոֆիայի երաժշտական և Կատարինա Գուրսկա բարձրագույն երաժշտական դպրոցների պրոֆեսոր Զոհրաբ Թադևոսյանը շնորհակալություն է հայտնել մրցույթի ժյուրիի անդամներին համատեղ աշխատանքի համար և մրցույթի կազմակերպիչներին‚ որոնք խիզախել և ստեղծված բարդ պայմաններում բարձր մակարդակով կյանքի են կոչել երաժշտական այս ստուգատեսը։
Ժյուրիի անդամ‚ «Ալ Բուստան» փառատոնի գեղարվեստական ղեկավար‚ Մինսկի «Բոլշոյ» օպերայի և բալետի ազգային ակադեմիական թատրոնի հրավիրյալ գլխավոր դիրիժոր Ջանլուկա Մարչիանոն նկատել է‚ որ մեծ պատիվ էր լինել մրցույթի ժյուրիի անդամ։ Ըստ նրա՝ բոլոր երեք փուլերն էլ լի էին գեղեցիկ երաժշտությամբ։ Ջանլուկա Մարչիանոյի կարծիքով՝ Խաչատրյանական մրցույթը մեծ փորձառություն էր‚ քանի որ ինքը չէր պատկերացնում‚ թե ինչ պետք է տեղի ունենա‚ հատկապես երրորդ փուլում‚ որն ուղեկցվում էր արհեստական բանականության միջոցով. «Սա լավագույնն էր‚ որ կարելի էր անել տեխնոլոգիաների ընձեռած հնարավորությունների կիրառմամբ»։
Շանհայի կոնսերվատորիայի պրոֆեսոր‚ Շանհայի Իսահակ Ստեռնի ջութակի միջազգային մրցույթի համանախագահ‚ Հարբինի ջութակի միջազգային մրցույթի նախագահ Վերա Ցու Վեիլինգն էլ նկատել է‚ որ նորագույն տեխնոլոգիաներով անցկացված մրցույթը մեծ մարտահրավեր էր‚ սակայն ամեն ինչ գերազանց էր։
Դիանա Ադամյանն իր ուրախությունը է հայտնել մրցույթում հաղթող ճանաչվելու համար. «Արամ Խաչատրյան անունն ինձ համար շատ մեծ խորհուրդ ու նշանակություն ունի։ Խաչատրյանի Ջութակի կոնցերտը մի քանի անգամ կատարել եմ‚ և ամեն անգամ նորանոր զգացողություններ են առաջացել։ Ուրախ եմ մասնակցել առցանց մրցույթին՝ մի քիչ այլ ձևաչափով‚ սակայն ոչ պակաս հետաքրքիր։ Շատ ուսանելի էր առցանց մրցույթը‚ այն‚ ինչ յուրացրի‚ հետագայում կկարողանամ կիրառել»։
Մրցույթի փակման գալա համերգի ընթացքում Դիանա Ադամյանը Հայաստանի պետական սիմֆոնիկ նվագախմբի հետ հեռավար կատարել է Խաչատրյանի Ջութակի կոնցերտը։
Հիշեցնենք‚ որ Խաչատրյանի անվան 16-րդ միջազգային մրցույթն այս տարի անցկացվում էր առցանց՝ բարձր տեխնոլոգիաների և արհեստական բանականության շնորհիվ։ Մրցույթի երրորդ փուլում մասնակիցներն ու նվագախումբը հանդես են եկել հեռավար։
