ԱԺ անկախ պատգամավոր Արման Բաբաջանյանի կարծիքով՝ կառավարության ամենամեծ ձախողումը ուժային կառույցներում վարչապետի նախորդ երկու նշանակումներն էին:
«Տպավորություն է, որ մենք գործ ունենք ոստիկանության, ԱԱԾ մարմինների որոշ շրջանակների՝ պետականության դեմ կազմակերպած դիմադրության կամ սաբոտաժի հետ: Հեղափոխության առաջին ոստիկանապետը, որն այսօր ռուսահայ օլիգարխի թիկապահների խմբի ղեկավարն է, և ԱԱԾ տնօրենի նշանակումը, որի մասին չեմ էլ ուզում նույնիսկ խոսել։ Դուք, պարո՛ն վարչապետ, նախկինում քանիցս նշել եք, որ Հայաստանում օլիգարխիան ջախջախված է, պիտի չհամաձայնեմ ձեզ հետ, որովհետև մեր պետության թե՛ տնտեսական, թե՛ քաղաքական և թե՛ ազգային անվտանգության խնդիրները հեղափոխությունից 2 տարի անց էլ մնում են օլիգարխիան և դրա կազմաքանդումը»,- ասաց Բաբաջանյանը:
Պատգամավորի խոսքով՝ դատական համակարգում կան նախկին իշխանություններին և օլիգարխներին կամակատար դատավորներ։
«Նախորդ տարի ձախողեցինք դատական համակարգում իրական զտում իրականացնելու նպատակադրումները և այսօր ստիպված ենք արձանագրել, որ դեռևս չունենք նախկին որևէ պաշտոնյայի կամ կոռուպցիոների վերաբերյալ օրինական ուժի մեջ մտած գեթ մեկ դատավճիռ։ Փոխարենը՝ դրան զուգահեռ ունենք հանրապետության տարածքը լքած մեծ թվով նախկին պաշտոնյաներ, որոնք կարողացել են խուսափել պատասխանատվությունից՝ հենց իրավապահ մարմինների ու դատական համակարգի վրա ունեցած ստվերային ազդեցության շնորհիվ»,- շեշտեց նա։
Մեջբերելով վարչապետ Նիկոլ Փաշինյանի երեկվա ելույթից մեկ հատված, որում նա ասում էր՝ կադրերը որոշում են ամեն ինչ, Բաբաջանյանը հարցրեց․ «Ո՞վ կամ ի՞նչն էր խանգարում իշխանությանն անցած 2 տարիներին կադրերը համալրել առողջ, կարող ու նվիրյալ մարդկանցով»։
Բաբաջանյանն ասաց, թե հեղափոխության հռչակումներից բխած նախանշած նպատակադրումները կարող են ձախողվել երկու հիմնական պատճառներով, եթե վարչապետի ընտրած կադրերի կարողությունները չհամապատասխանեն առաջադրված նպատակներին և անհիմն բյուրոկրատիայի պատճառով փոշիանան:
