Վրաստանում տեղի է ունեցել երկրի նոր Կաթողիկոս‑Պատրիարքի ընտրությունը՝ գրեթե կես դարի ընթացքում առաջին անգամ: Իրադարձությունը կարող է ազդել ոչ միայն Վրաց Ուղղափառ Եկեղեցու (ՎՈՒԵ) ներքին գործընթացների, այլև երկրի զարգացման քաղաքական վեկտորի վրա, գրում է BBC-ն:
Վրաց Ուղղափառ Եկեղեցու ընդլայնված խորհուրդը Վրաստանի 142-րդ Կաթողիկոս-Պատրիարք, նոր հոգևոր առաջնորդ է ընտրել է Նորին Սրբություն Շիոյին: Իլիա II-ի մահից հետո ՎՈՒԵ-ն կգլխավորի 57-ամյա մետրոպոլիտ Շիոն: Զգուշավոր, ոչ հրապարակային և պահպանողական՝ այսպես են ներկայացնում Վրաստանի նոր հոգևոր առաջնորդին: Նա հազվադեպ է հարցազրույցներ տալիս լրագրողներին, ավելի հաճախ հայտնվում է միջոցառումներին՝ իշխանության ներկայացուցիչների շրջապատում։
2017 թվականի նոյեմբերի 23-ին Շիո եպիսկոպոսը նշանակվել է պատրիարքական գահի տեղապահ, 2018 թվականի հունիսի 21-ին Սուրբ Սինոդի նիստում նրան շնորհվել է սկուֆիայի վրա ադամանդե խաչ կրելու իրավունքը:
Խորհրդի նիստը կայացել է Թբիլիսիի Սուրբ Երրորդություն մայր տաճարում: Քվեարկությանը մասնակցեցել է Սինոդի 38 անդամ, մեկ ձայն չեղարկվել է։ Նորընտիր կաթողիկոս-պատրարքի օգտին քվեարկել են մասնակիցներից 22-ը:
Եկեղեցական հավաքին մասնակցել է մոտ 1200 պատվիրակ: Նիստը ներառել է պատրիարքական գահի թեկնածուների ուղերձները, ինչպես նաև տարբեր թեմեր ներկայացնող պատվիրակների ելույթները: Գիտնականներից մեկը հանդես է եկել նաև պատմական ակնարկով՝ կապված Վրաստանի Կաթողիկոս-Պատրիարքի տիտղոսի հետ:
Կաթողիկոս-Պատրիարքի ընտրության քվեարկությանը մասնակցելու իրավունք ունեն միայն եպիսկոպոսները: Այն թեկնածուն, որն ստացել է քվեարկությանը մասնակցող եպիսկոպոսների ձայների կեսից ավելին՝ տվյալ դեպքում 20 ձայն, համարվել է ընտրված Համայն Վրաստանի Կաթողիկոս-Պատրիարք:
Հիշեցնենք, որ ապրիլի 28-ին Պատրիարքարանում գումարված Սուրբ Սինոդի նիստում Սինոդի անդամներն ընտրել են Պատրիարքական գահի երեք թեկնածուի:
Կաթողիկոս-Պատրիարքի թեկնածուներն էին՝ Պատրիարքական գահի տեղապահ, Սենակիի և Չխորոծկուի մետրոպոլիտ Շիոն, Մրովելիի և Ուրբնիսիի մետրոպոլիտ Հոբը և Փոթիի ու Խոբիի մետրոպոլիտ Գրիգոլը:
