«Ռոսատոմ»-ը դադարեցրել է Իրանի «Բուշերի» ատոմակայանի շինարարությունը՝ հայտարարել է Ռուսաստանի պետական կորպորացիայի գլխավոր տնօրեն Ալեքսեյ Լիխաչովը։ Ավելի վաղ հաղորդվել էր, որ քաղաքը, որտեղ գտնվում է կայանը, հարվածի տակ է հայտնվել Իրանի դեմ ԱՄՆ-ի և Իսրայելի ռազմական գործողության մեկնարկից հետո:
«Ռոսատոմ»-ի ղեկավարի խոսքով՝ Իրանի միջուկային ոլորտի ղեկավարության հետ կապը խզվել է. հեռախոսները լռում են, էլեկտրոնային նամակները՝ անպատասխան:
Մերձավոր Արևելքում իրավիճակի սրման պատճառով Բուշերի ատոմակայանի համար սպառնալիքը, որտեղ աշխատում են ռուսաստանցի միջուկային գիտնականները, կա և շարունակում է աճել՝ հայտարարել է Լիխաչովը։
«Ներկայումս Բուշերում մնում է Ռուսաստանի 639 քաղաքացի, և նախապատրաստական աշխատանքներ են տարվում նրանց խմբերով տարհանելու համար։ Փետրվարի 28-ի հարձակումներից անմիջապես հետո երկրից տարհանվել են աշխատակիցների երեխաները և անձնակազմի մոտ հարյուր մարդ։ Հաջորդ փուլը՝ ևս 150-200 մասնագետի տարհանումը, տեղի կունենա հենց որ ռազմական իրավիճակը թույլ տա»,- ասել է պետական կորպորացիայի ղեկավարը։
