Ազգային ժողովը քննարկում է «Կշիռների և չափերի միջազգային բյուրոյին (ԿՉՄԲ/BIPM» ասոցացված անդամ դառնալու մասին» և «Օրենսդրական չափագիտության միջազգային կազմակերպությանը (ՕՉՄԿ/OIML)» թղթակցային անդամ դառնալու մասին» նամակ-համաձայնագրերը վավերացնելու մասին օրենքի նախագիծը:
Հիմնական զեկուցող, էկոնոմիկայի նախարար Գևորգ Պապոյանը մանրամասնեց՝ Հայաստանը, ի դեմս Էկոնոմիկայի նախարարության, «Ստանդարտացման և չափագիտության ազգային մարմինը» դառնում է «Կշիռների և չափերի միջազգային բյուրոյի ասոցացված անդամ և «Օրենսդրական չափագիտության միջազգային կազմակերպության թղթակցային անդամ:
«Երկար տարիներ այդ ոլորտը մեզանում անտերության էր մատնված և վերջին տարիներին օրենսդրական և նյութատեխնիկական փոփոխությունները, Կառավարության կողմից միլիարդավոր դրամների ներդրումները ոլորտում, ի դեմս սարքավորումների, ինչպես նաև համապատասխան օրենսդրական փոփոխությունները, որոնք արվել են վերջին տարիներին, բերեցին նրան, որ մենք, ըստ էության, արդեն հիմա ասոցացված և թղթակցային անդամ ենք դառնում: Այսինքն՝ կատարված աշխատանքը ոչ միայն մենք ենք տեսնում, մեր տնտեսվարողները, այլև, ըստ էության, բարձրացանք մի մակարդակ վերև»,- ասաց Պապոյանը:
Նրա խոսքով՝ սրա միջոցով մենք հնարավորություն կունենանք բարելավել մեր բիզնես միջավայրը, հեշտացնել մեր գործարարների կյանքը, և ուժեղացնել արտահանումը բարձր, զարգացած շուկաներ, որտեղ պահանջները բավական բարձր մակարդակի վրա են:
Հայաստանի Հանրապետության անդամակցությունը միջազգային չափագիտության կազմակերպություններին, մասնավորապես՝ OIML-ին (International Organization of Legal Metrology) և BIPM-ին (Bureau International des Poids et Mesures), ունի մի շարք կարևոր ռազմավարական, տնտեսական և տեխնիկական հիմնավորումներ, մասնավորապես՝
1. տնտեսական և առևտրային տեսանկյունից՝ կապահովի միջազգային առևտրի խթանումը, քանի որ OIML և BIPM անդամակցությունը երաշխավորում է չափումների միջազգային համադրելիությունը, ինչը կարևոր է արտահանման և ներմուծման գործընթացներում տեխնիկական խոչընդոտների նվազեցման համար.
2. կստեղծի հավասար մրցակցային պայմաններ, որի արդյունքում հայ արտադրողները հնարավորություն կստանան մուտք գործելու արտասահմանյան շուկաներ՝ առանց կրկնակի փորձարկումների կամ չափումների վկայագրերի.
3. ներդրումների գրավչության ստեղխում, քանի որ անդամակցության արդյունքում միջազգային չափագիտության պահանջներին համապատասխան չափման համակարգն կավելացնի վստահությունը տնտեսական միջավայրի նկատմամբ՝ նպաստելով ներդրումների ներգրավմանը.
4. տեխնիկական և գիտական տեսանկյունից՝ անդամակցությունը կապահովի չափումների ճշգրտության բարելավում, ինչը պայմանավորված է նրանով, որ BIPM-ն վերահսկում է չափման միավորների համաշխարհային համակարգը (SI համակարգ), և անդամակցությունն էլ կապահովի ՀՀ-ի մասնակցությունը այդ համակարգի զարգացմանը, խթանելով մասնագիտական զարգացումը և փորձի փոխանակումը: Հայաստանը հնարավորություն է ստանում մասնակցել փորձագետների պատրաստման ծրագրերին, գիտաժողովների, ու տեխնիկական կոմիտեների աշխատանքին, ապահովելով տեղական չափագիտական ենթակառուցվածքների զարգացում: Անդամակցությունը խթանում է ՀՀ-ում չափումների ազգային համակարգի ներդաշնակեցումը միջազգային չափանիշներին:
5. ինստիտուցիոնալ տեսանկյունից՝ անդամակցությունը կապահովի օրենսդրական չափագիտության ամրապնդում, OIML-ի անդամակցությունը կօգնի օրենսդրական չափագիտության ոլորտի բարելավմանը՝ ստեղծելով վստահելի և թափանցիկ չափման համակարգ: Չափման միավորների ազգային համադրություն BIPM-ի հետ կապահովի Հայաստանին դառնալու համաշխարհային չափագիտության համակարգի մի մասը ինչը կարևոր է չափագիտական անկախության համար:
6. անդամակցությամբ կապահովվի ոլորտի համապատասխանությունը ԵՄ պահանջներին: Անդամակցությունը նպաստում է հայկական չափագիտական համակարգի ներդաշնակեցմանը տարածաշրջանային և միջազգային պահանջների հետ, ինչը հիմնարար և կարևոր է եվրոպական շուկայի համար, ապահովելով համագործակցության խորացումը:
Անդամակցությունը կբարձրացնի Հայաստանի միջազգային վարկանիշը տեխնիկական ոլորտում՝ դառնալով կապող օղակ Կովկասում՝ միջազգային չափագիտության համակարգերում:
