Ուկրաինայի նախագահը պատրաստ է հանրաքվեի դնել Ռուսաստանի հետ հակամարտության ավարտի՝ 20 կետից բաղկացած ծրագիրը, եթե Մոսկվան համաձայնի հրադադարի առնվազն 60 օրով: Axios-ի հետ հարցազրույցում Վոլոդիմիր Զելենսկին նշել է, որ բանակցություններում լուրջ առաջընթաց է գրանցվել: Այնուամենայնիվ, ծրագրով նախատեսվում է, որ Ուկրաինան արևելքում մեծ տարածքային զիջումների պետք է գնա: Զելենսկին հույս ունի ավելի լավ պայմանների հասնել տարածքների հարցում, սակայն եթե առաջընթաց չգրանցվի, ապա, ըստ նրա, հարկավոր է ուկրաինացիների հավանությունը խաղաղության պլանին: Զելենսկու խոսքով՝ անվտանգության երաշխիքներին առնչվող փաստաթղթերը պատրաստ են. մնացել են միայն որոշ տեխնիկական հարցեր:
Դեկտեմբերի 28-ին Ֆլորիդայի Փալմ Բիչ քաղաքում նախատեսվում է Վոլոդիմիր Զելենսկու և ԱՄՆ նախագահ Դոնալդ Թրամփի հանդիպումը: Ուկրաինայի նախագահի խոսքով՝ հանդիպման նպատակն է օգտագործել բանակցողների գրանցած առաջընթացը և հնարավորինս շուտ հասնել պատերազմի ավարտին:
New York Post-ի հետ զրույցում Թրամփը լավատեսություն է հայտնել խաղաղության համաձայնագրի կնքման առնչությամբ։
«Կարծում եմ՝ մենք լավ հնարավորություն ունենք»,- ասել է նա։
Միևնույն ժամանակ ԱՄՆ նախագահը հայտարարել է, որ ռուս-ուկրաինական ճգնաժամի լուծումը կախված է իր դիրքորոշումից: POLITICO-ի հետ հարցազրույցում խոսելով Զելենսկու հետ նախատեսված հանդիպման մասին՝ Թրամփը նշել է. «Նա ոչինչ չի ունենա, եթե ես չհաստատեմ դա։ Կտեսնենք, թե նա ինչ ունի»: Միևնույն ժամանակ, Թրամփն ակնկալում է, որ Վոլոդիմիր Զելենսկու հետ հանդիպումը լավ կընթանա: ԱՄՆ նախագահը հավելել է, որ նախատեսում է նաև զրուցել իր ռուս գործընկեր Վլադիմիր Պուտինի հետ:
Ըստ POLITICO-ի՝ բացի անվտանգության երաշխիքներից, Թրամփ-Զելենսկի հանդիպման ընթացքում կքննարկվեն նաև Զապորոժիեի ատոմակայանի կառավարումը և Դոնբասի նկատմամբ վերահսկողությունը:
Միջազգային այլ լուրեր՝ տեսաշարով:
Հեղինակ՝ Սյուզաննա Չրաղյան
