Հունգարիա-Հայաստան նախախաղային մամուլի ասուլիսի ժամանակ Հայաստանի ազգային հավաքականի և լեհական «Լեգիայի» կիսապաշտպան Վահան Բիչախչյանն ընդգծեց՝ Հունգարիան լավ հավաքական է, խմբում բոլորն են ուժեղ․ «Բոլոր խաղերն էլ դժվար են լինելու, մեզ սպասվում են ծանր հանդիպումներ, բայց լավ ենք պատրաստվել, և թիմում ուրախ մթնոլորտ է տիրում»։
Նա նշեց՝ թիմը գտնվում է շատ լավ վիճակում, եկել են Բուդապեշտ, որպեսզի լավ ֆուտբոլ խաղան, անմնացորդ նվիրվեն ու հասնեն դրական արդյունքի։
«Շատ լավ ենք ուսումնասիրել Հունգարիայի հավաքականին։ Ունենք մեր ծրագիրը, և հուսով եմ՝ կկարողանանք այն լիովին օգտագործել վաղը։ Կներդնենք բոլոր ուժերը խաղադաշտում ու կխաղանք այն ֆուտբոլը, որը մենք ենք ուզում, և հաստատ խնդիրներ կստեղծենք հակառակորդի համար։
Ժամանակ է պետք, որ մարզիչը կարողանա լիովին փոխանցել իր մտքերն ու ցանկությունները մեզ, բայց ամեն ինչ շատ լավ է ընթանում։ Կարող եմ ասել, որ մինչև այսօր հասցրել ենք իրար ճանաչել, և վստահ եմ՝ մեր նոր մարզչի հետ հավաքականը ավելի լավ տեսք կունենա, կլինի ավելի ուժեղ և կհասնենք մեր առջև դրված նպատակներին»,-ասաց Բիչախչյանը։
ԱԱ-2026-ի եվրոպական գոտու որակավորման փուլի F խմբի երրորդ տուրի Հունգարիա -Հայաստան հանդիպումը կկայանա հոկտեմբերի 11-ին՝ Երևանի ժամանակով 20:00-ին։
