Եվրոպայի խորհրդի խորհրդարանական վեհաժողովն ընդունել է Վրաստանի վերաբերյալ բանաձև։ Բանաձևի նախագիծը քվեարկության է դրվել լիագումար նիստում։
«Աջակցություն Վրաստանում ժողովրդավարությանը և օրենքի գերակայությանը» վերնագրով նախագիծը հավանության է արժանացել 77 պատվիրակներից 68-ի կողմից։ Յոթը դեմ է քվեարկել, իսկ երկուսը՝ ձեռնպահ։
Բացի այդ, քվեարկությունից առաջ փաստաթղթում որոշ փոփոխություններ են կատարվել։
Մասնավորապես, փոփոխություններից մեկի համաձայն՝ «Վեհաժողովը մտահոգություն է հայտնում այն տեղեկատվության վերաբերյալ, որի համաձայն՝ Վեհաժողովում Վրաստանի պատվիրակության նախկին անդամները կարող են ենթարկվել քրեական հետապնդման իրենց անդամակցության ընթացքում տրված ձայների կամ իրականացված գործունեության համար։ Վեհաժողովը ևս մեկ անգամ վերահաստատում է, որ իր անդամները չեն կարող ենթարկվել դատական հետապնդման իրենց գործառույթների իրականացման ընթացքում տրված կամ արտահայտված ձայների համար և կոչ է անում անդամ պետություններին ձեռնարկել բոլոր ջանքերը՝ նման իրադարձությունները կանխելու համար»։
Բանաձևի մնացած կետերը մնացել են անփոփոխ։ Փաստաթղթում նշվում է, որ Վրաստանի իշխանությունները պարբերաբար անտեսում են միջազգային հանրության առաջարկները երկրում ժողովրդավարական ճգնաժամի հաղթահարման վերաբերյալ, կասկածի տակ է դրվում Վրաստանում ժողովրդավարության ապագան:
«Վեհաժողովը դատապարտում է Վրաստանում ընդդիմության անդամների, լրագրողների և քաղաքացիական հասարակության ներկայացուցիչների՝ քաղաքական դրդապատճառներով հետապնդումները: Դրանք ուղղված են այլախոհության ճնշմանը և անհամատեղելի են ժողովրդավարական հասարակության հետ»,- ասված է բանաձևում:
Փաստաթղթում անդրադարձ է կատարվում Վրաստանում հոկտեմբերի 4-ին նախատեսված տեղական ընտրություններին, ընդգծվում է՝ ժողովրդավարական ընտրությունների համար բարենպաստ ընտրական միջավայրի ստեղծման անհապաղ ներառական գործընթացի վերաբերյալ ԵԽԽՎ-ի կոչը ուշադրության չի արժանացել:
