Այս տարվա առաջին եռամսյակում Քաղաքաշինության տեխնիկական և հրդեհային անվտանգության տեսչական մարմինը 14 ինքնակամ շինություն է հայտնաբերել Հայաստանի տարբեր մարզերում: Մի դեպքում, օրինակ, Օպերային թատրոնի շրջակայքում գտնվող սրճարաններից մեկի տանիքն են բարձրացրել, կոնստրուկտիվ տարրերի փոփոխություն իրականացրել, մյուս դեպքում էլ Բուզանդի փողոցում գտնվող շենքերից մեկին կից ապօրինի վերելակ են տեղադրել, որն այսօր ապամոնտաժում էին:
Թե ինչու էր այս շենքի 3-րդ հարկի բնակիչը որոշել դեպի իր տուն տանող առանձին վերելակ ու աստիճաններ ունենալ՝ չհաջողվեց պարզել: Սեփականատիրոջ ներկայացուցիչ ներկայացած անձը նախ փորձեց խոչընդոտել նկարահանումը, ապա սկսեց հեռախոսով հաղորդել նկարահանող խմբի տվյալները:
Արտաշես Սարգսյան (ՀՀ ՔՏՀԱՏՄ քաղաքաշինական գործունեության վերահսկողության վարչության պետ) - Ամբողջ մարզերի տարածքում մշտադիտարկում ենք իրականացնում, «Քաղաքաշինության մասին» օրենքով վերապահված լիազորությունների սահմաններում հայտնաբերում ենք և նույն օրենքի 26 հոդվածով գրություններ ենք ուղարկում համայնքի ղեկավարներին, որպեսզի ինքնակամ էդ շինարարարական աշխատանքների հետևանքները վերացվեն:
Եթե համայնքի ղեկավարը` 30, իսկ երկարաձգման դեպքում՝ 60 օրվա ընթացքում որևէ քայլ չի ձեռնարկում, ենթարկվում է վարչական պատասխանատվության: Տարածքի՝ սեփականություն հանդիսանալու պարագայում՝ վարչական պատասխանատվության է ենթարկվում սեփականատերը:
Արտաշես Սարգսյան - Եթե կոնստրուկտիվ տարրերի միջամտություն է տեղի ունենում, դա պետք է լինի անպայման նախագծով և համապատասխան փորձաքննության հիման վրա, այսինքն՝ եթե փոխվում են կոնստրուկտիվ տարրերը, դա արդեն պետք է լինի քաղաքաշինական փաստաթղթերով և շինարարության թույլտվությունով:
Այս տարվա առաջին եռամսյակում տեսչական մարմնի կողմից տրվել է 682 ավարտական ակտի եզրակացություն, որից 348-ը՝ դրական, 334-ը՝ բացասական: Բացասական եզրակացությունները հիմնականում վերաբերում են նախագծային շեղումներին, կատարողական փաստաթղթերի ոչ պատշաճ ներկայացմանը, վերահատակագծման նախագծային խախտումներին:
Կատարվել է նաև 404 տեղազննություն ու դիտարկում, որից 301-ը՝ ընդհանուր բնույթի և 103-ը` սուբվենցիոն ծրագրերի շրջանակում։
Արտաշես Սարգսյան - Մենք նաև իրավասություն ունենք սուբվենցիոն ծրագրերի շրջանակներում կառուցվող բոլոր օբյեկտներում ընթացիկ ուսումնասիրության, այսինքն՝ մենք այդ ճանապարհները, դպրոցները, որոնք սուբվենցիոն ծրագրերի շրջանակում են, ուսումնասիրություն ենք անում, տալիս ենք պարտադիր կատարման ցուցումներ, եթե թերությունն էլ հայտնաբերվում է, նաև վարույթներ ենք անում, նույն ստուգումներն ենք անում և համապատասխան վարչարարություն ենք իրականացնում:
Սուբվենցիոն ծրագրերում հայտնաբերված թերություններից մի քանիսն էլ վերաբերում են գծանշումների բացակայությանը, ճանապարհային նշանների տեղադրմանը, նաև անձրևաջրերի հեռացման համակարգի խնդիրներին:
Հեղինակ` Լիանա Խաչատուրյան:
