Ծիրան, խաղող, խնձոր, դեղձ, սալոր, ցորեն, գարի, վարսակ, ձմերուկ, սեխ, կարտոֆիլ, բալ ու կեռաս ունեցող ֆերմերներն արդեն կարող են ապահովագրել իրենց այգիներն ու ցանքատարածքները՝ ընդհանուր 13 մշակաբույս:
Արման Խոջոյան (ՀՀ էկոնոմիկայի նախարարի տեղակալ) - Նախորդ շաբաթ Կառավարությունը հաստատեց ապահովագրության ծրագիրը, համաձայն որի՝ փետրվարի 1-ից մեկնարկում է գյուղատնտեսության ապահովագրությունը:
Արդեն երեք տարի երկրում իրականացվող ապահովագրության փորձնական ծրագրին Կառավարությունն այս տարի ևս ֆինանսական աջակցություն կցուցաբերի, որից ուղղակիորեն կօգտվեն ֆերմերային տնտեսությունները: Ապահովագրավճարների գումարի 50-60 տոկոսը կփոխհատուցվի պետական միջոցներից:
Արման Խոջոյան - Օրինակ՝ նախորդ տարի՝ 2022 թվականին, հավաքվել է ընդհանուր առմամբ 866 միլիոն դրամ ապահովագրավճար, որի շուրջ 60 տոկոսը փոխհատուցել է Կառավարությունը:
Հատկապես անցած տարվա փորձը ցույց տվեց, որ գյուղատնտեսության ապահովագրության ծրագիրը գործում է հօգուտ ֆերմերների: Վճարած 866 միլիոն դրամի դիմաց ֆերմերներին փոխհատուցվել է մեկ միլիարդ երեք հարյուր հազար դրամ: Կնքվել էր ավելի քան հինգ հազար պայմանագիր, որից շուրջ երկու հազար հարյուր ֆերմեր վնասի փոխհատուցում է ստացել: Ծրագրի շրջանակում ֆերմերներն այս տարի կարող են ապահովագրել 13 մշակաբույս՝ պաշտպանելով իրենց բերքը բնակլիմայական երեք ռիսկից՝ կարկուտից, հրդեհից և ցրտահարությունից: Հաշվի առնելով տարեցտարի փոփոխվող բնակլիմայական պայմանները՝ անցած տարի փորձնական ապահովագրեցին նաև սակավաջրության ռիսկից: Փորձը ցույց տվեց, որ այն ևս անհրաժեշտ է ֆերմերներին: Այս տարի որպես նորույթ նրանք կարող են օգտվել նաև այդ ապահովագրատեսակից: