Կոտայքի մարզ այցի շրջանակում վարչապետի տիկին Աննա Հակոբյանը այցելել է նաև Հրազդան համայնք, հյուրընկալվել Արթուր Միքայելյանի տանը: Վարչապետի տիկին Աննա Հակոբյանին դիմավորել են Հրազդան համայնքի ղեկավար Սևակ Միքայելյանը և Արթուր Միքայելյանի հայրը:
Արթուր Միքայելյանը հայտնի է մի շարք հաղորդումներում իր մասնակցությամբ: 3 տարեկանից գրում և կարդում է, չնայած ուշ է սկսել խոսել:
Արթուրը կարողանում է մեծ թվեր գումարել-հանել, անմիջապես հաշվել երաժշտության տևողությունը: Վայրկյանների, րոպեների հանդեպ առանձնահատուկ սեր ունի, գիտի նաև, թե ցանկացած երկրում որ ժամն է, և, օրինակ՝ 50 տարի առաջ հունվարի 1-ը շաբաթվա ինչ օր է:
Արթուրի նախասիրությունները ժամանակ առ ժամանակ փոխվում են, հիմա հետաքրքրվում է ռուսական սերիալներով և դրանց մասին հնարավոր ամբողջ տեղեկությունները գրում է սպիտակ թերթի վրա, իր յուրօրինակ ձեռագրով: Իր կարողությունների համար Արթուրի անունը հայտնվել է նաև Դյուցազնագրքում:
Արթուրի մայրը ցանկանում է համապատասխան մասնագետ գտնել, որը կբացահայտի Արթուրի ունակությունները և կօգնի իրեն, բայց դեռ չի հաջողվում:
Արթուրը նաև չարն ու բարին է տարբերում, պատմում են տան անդամները, կարող է անգամ տանից դուրս հրավիրել այն մարդուն, ում չի հավանում:
Աննա Հակոբյանը զրուցել է Արթուրի ու տան անդամների հետ, հետաքրքրվել նրա նախասիրություններով:
Աննա Հակոբյանը Կոտայքի մարզ այցը ավարտում է Ծաղկաձոր համայնքի Մեղրաձոր գյուղում գտնվող «Մեղրաձոր» էթնո գաստրոտանը, որտեղ նրան դիմավորել են Ծաղկաձոր համայնքի ղեկավար Նարեկ Հարությունյանը, Մեղրաձորի մշակույթի տան տնօրեն Գոհար Գոգոլյանն ու գաստրոտան տնօրեն Վարդան Եղիազարյանը:
Այստեղ այցելուները կարող են ծանոթանալ Մեղրաձոր համայնքի ավանդույթներին ու յուրահատուկ խոհանոցին:
Վարդան Եղիազարյանը վարչապետի տիկնոջն է ներկայացնում իր ձեռագործ աշխատանքները, որոնք պատրաստում է խաղողի արմատներից: Հավելում է, գրեթե չի միջամտում և ներկայացնում է արվեստի աշխատանքներն այնպես, ինչպես դրանք հողից են դուրս գալիս:
Աննա Հակոբյանը հետաքրքրվում է, թե ինչպես գաստրոտուն ստեղծելու միտքն առաջացավ: Վարդան Եղիազարյանի խոսքով՝ փայտի հետ աշխատել մանկուց է սիրել, հաճելի զբաղմունքը կյանքի գործ է դարձրել:
Էթնո գաստրոտուն էին եկել նաև Մեղրաձորի մշակույթի տան սաները: Վարչապետի տիկինը երեխաներից հետաքրքրվում է, թե մշակույթի տանը ինչով են զբաղվում ու ինչ են սովորում: Մշակույթի տանը 4 խմբակ է գործում` գորգագործություն, կարպետագործություն, թաղիքագործություն և տիկնիկագործություն:
Մշակույթի տունը նաև վերարտադրում է բոլոր մոռացված տոներն ու ծիսակարգերը, այսօր հյուրերի համար բեմադրել ու ավանդական կարգով ներկայացնում էին Կաղանդն ու Սուրբ Ծնունդը:
