ԱՄՆ վարչակազմը բանակցություններ է վարում Հայաստանի և Ադրբեջանի հետ՝ թույլ չտալու հակամարտության վերսկսման հանգեցնող քայլեր։ Այդ մասին հայտարարել է ԱՄՆ պետքարտուղար Էնթոնի Բլինքենը։
Կոնգրեսի Ներկայացուցիչների պալատի արտաքին գործերի հանձնաժողովի լսումների ժամանակ նրան խնդրել են մեկնաբանել Լեռնային Ղարաբաղի շուրջ ստեղծված իրավիճակը։
«Ես ակտիվորեն զբաղվում եմ այդ հարցով։ Բազմիցս զրուցել եմ Հայաստանի վարչապետ Փաշինյանի և Ադրբեջանի նախագահ Ալիևի հետ՝ համոզվելու, որ որևէ մեկը չի փորձի այնպիսի քայլեր ձեռնարկել, որոնք կարող են հանգեցնել հակամարտության վերսկսման, նաև փորձել եմ աջակցել տևական քաղաքական կարգավորմանը»,- նշել է պետքարտուղարը, հավելել՝ բանակցություններ է վարում նաև երկու երկրի ԱԳ նախարարների հետ։
ՀՀ-ԻՆ ԵՎ ԱՐՑԱԽԻՆ 150 ՄԼՆ ԴՈԼԱՐ ՀԱՏԿԱՑՆԵԼՈՒ ԱՌԱՋԱՐԿ ԱՄՆ-ԻՆ
ԱՄՆ Կոնգրեսի ներկայացուցիչների պալատի 64 անդամ ապրիլի 28-ին նամակ է հղել հատկացումների հանձնաժողովի նախագահին՝ խնդրելով դադարեցնել Ադրբեջանին տրամադրվող ամերիկյան ռազմական օժանդակությունը և 150 միլիոն դոլար տրամադրել Հայաստանին ու Արցախին՝ դիմագրավելու Ադրբեջանի և Թուրքիայի գործողությունների պատճառով ստեղծված հումանիտար և անվտանգային ճգնաժամին։
Օրենսդիրները՝ Կոնգրեսի հայկական խմբի համանախագահ Ֆրենկ Փալոնի առաջնորդությամբ, նշել են, որ Արցախի ժողովուրդը շարունակում է բախվել լուրջ դժվարությունների, որոնք առաջացել են ինչպես 2020 թ․ ադրբեջանական ագրեսիայի, այնպես էլ խաղաղ բնակչության դեմ մինչ օրս շարունակվող սադրանքների պատճառով։ Արցախին հատկացվելիք 50 միլիոն դոլարը, նրանց կարծիքով, «կօգնի աջակցել հայ փախստականներին, իսկ Հայաստանին տրամադրվող 100 միլիոն դոլարը կամրապնդի ԱՄՆ-Հայաստան ռազմավարական գործընկերությունը։
Օրենսդիրները կարևորել են նաև հայ ռազմագերիների ազատ արձակումը։
ՔՆՆԱՐԿՎԵԼ Է «ԱԶՈՎՍՏԱԼԻ» ՏԱՐԱԾՔԻՑ ՄԱՐԴԿԱՆՑ ՏԱՐՀԱՆՄԱՆ ՀԱՐՑԸ
Ուկրաինայի նախագահ Վոլոդիմիր Զելենսկին և ՄԱԿ-ի գլխավոր քարտուղար Անտոնիու Գուտերեշը քննարկել են Մարիուպոլ քաղաքի «Ազովստալ» գործարանի տարածքից մարդկանց տարհանման հարցը: Այդ մասին նախօրեին հայտարարել է կառույցի ղեկավարը՝ Զելենսկու հետ հանդիպումից հետո։ Գուտերեշը ժամկետներ չի նշել՝ գործընթացը չխափանելու համար։
Զելենսկին, իր հերթին, ընդգծել է, որ Կիևը պատրաստ է այդ հարցով հրատապ բանակցությունների։ Ուկրաինայի նախագահը հայտնել է նաև, որ Գուտերեշի հետ իր բանակցությունների ժամանակ Կիևի ուղղությամբ 5 հրթիռ է արձակվել, կան տուժածներ։
Կրեմլից արձագանքել են՝ Ազովստալի շուրջ բանակցությունների կարիք Մոսկվան չի տեսնում․«Վլադիմիր Պուտինը հստակ ասել է՝ խաղաղ բնակիչները կարող են դուրս գալ գործարանից, իսկ զինծառայողները պետք է վայր դնեն զենքը»,- նշել է Ռուսաստանի նախագահի խոսնակ Դմիտրի Պեսկովը։
Ապրիլի 26-ին Գուտերեշը Մոսկվայում բանակցություններ է վարել ՌԴ նախագահ Վլադիմիր Պուտինի հետ։ ՄԱԿ-ից տեղեկացրել են, որ հանդիպման արդյունքում Մոսկվան համաձայնել է համաշխարհային կազմակերպության և Կարմիր խաչի ներգրավմանը «Ազովստալ»-ից խաղաղ բնակիչների տարհանման գործում։
Վլադիմիր Զելենսկու գրասենյակից հայտնում են՝ այսօր՝ ապրիլի 29-ին, նախատեսվում է խաղաղ բնակիչների տարհանումն «Ազովստալից»։
ՀԱՎԱՆՈՒԹՅՈՒՆ՝ ԿԻԵՎԻՆ ՍՊԱՌԱԶԻՆՈՒԹՅՈՒՆ ՏՐԱՄԱԴՐԵԼՈՒ ՕՐԻՆԱԳԾԻՆ
ԱՄՆ Կոնգրեսի Ներկայացուցիչների պալատը հավանություն է տվել «լենդ-լիզով» Կիևին սպառազինություն մատակարարելու մասին օրինագծին՝ արագացնելու Ուկրաինային ռազմական աջակցության տրամադրումը։ Նախաձեռնությանը կողմ է արտահայտվել 417, դեմ՝ 10 կոնգրեսական։ Օրինագիծը կներկայացվի նախագահ Ջո Բայդենի ստորագրմանը։
Փաստաթղթի համաձայն՝ Սպիտակ տան ղեկավարին կտրվեն ավելի լայն լիազորություններ՝ Ուկրաինայի քաղաքացիական բնակչությանը պաշտպանելու նպատակով Կիևի հետ ռազմական տեխնիկայի և գույքի ժամանակավոր օգտագործման մասին համաձայնագրեր ստորագրելու համար։
Նախագահի ընդլայնված լիազորությունները կավարտվեն, երբ հակամարտությունը դադարեցվի։
ԸՆԴԱՄԵՆԸ 250 ՄԼՆ ԴՈԼԱՐ՝ ԿԻԵՎԻՆ ՌԱԶՄԱԿԱՆ ՕԳՆՈՒԹՅԱՆ ՀԱՄԱՐ
Վաշինգտոնը կարող է ընդամենը 250 մլն դոլար ծախսել՝ Ուկրաինային ռազմական օգնություն տրամադրելու նպատակով․ այդքանն է մնացել ընթացիկ տարվա մարտին Կոնգրեսի հատկացրած 3,5 մլրդ դոլարի փաթեթից, հայտարարել է Սպիտակ տան մամուլի խոսնակ Ջեն Սակին։
Պենտագոնից էլ հայտնել են՝ ԱՄՆ-ն կարևորում է Կիևին C-300 տեսակի զենիթահրթիռային հակաօդային պաշտպանության համակարգերի տրամադրումը, որոնք վճռորոշ դեր են խաղում մարտի դաշտում։
Նախօրեին նախագահ Ջո Բայդենը Կոնգրեսին է ներկայացրել Ուկրաինայի անվտանգությանը, տնտեսությանն աջացելու և մարդասիրական կարիքների համար լրացուցիչ 33 մլրդ դոլար հատկացնելու մասին խնդրագիր։
ՍՈՒՄԳԱՅԻԹԻ ԱՐԴՅՈՒՆԱԲԵՐԱԿԱՆ ԿԵՆՏՐՈՆՈՒՄ ՀՐԴԵՀԸ ՄԱՐՎԵԼ Է
Ադրբեջանի Սումգայիթ քաղաքի արդյունաբերական կենտրոնի 5000 մ. ք տարածքում նախօրեին խոշոր հրդեհ է բռնկվել։ Աշխատակիցներն ու հարակից տարածքների բնակիչները տարհանվել են։
Այն այսօր առավոտյան մարվել է։ Հրդեհի պատճառները պարզվում են, աշխատակիցները չեն տուժել, այլ տուժածների մասին տեղեկություններ չկան։