ՊՈՒՏԻՆԸ ՀՐԱՄԱՆԱԳԻՐ Է ՍՏՈՐԱԳՐԵԼ ՊԱՏԱՍԽԱՆ ՊԱՏԺԱՄԻՋՈՑՆԵՐԻ ՄԱՍԻՆ
Ռուսաստանի նախագահ Վլադիմիր Պուտինը հրամանագիր է ստորագրել ոչ բարեկամ երկրների դեմ պատասխան պատժամիջոցների մասին։
Փաստաթղթում նշվում է, որ Ռուսաստանը կասեցրել է Եվրամիության, ինչպես նաև Նորվեգիայի, Իսլանդիայի, Լիխտենշտեյնի և Շվեյցարիայի հետ վիզային ռեժիմի դյուրացման վերաբերյալ համաձայնագրերի մի շարք դրույթներ։
Պուտինը ՌԴ ԱԳՆ-ին հանձնարարել է ծանուցել համապատասխան կառույցներին և ներկայացուցչություններին Մոսկվայի որոշման մասին։ Կրեմլի ղեկավարը հանձնարարել է նաև անձնական սահմանափակումներ մտցնել ոչ բարեկամական գործողություններ իրականացնող օտարերկրացիների և ՌԴ քաղաքացիություն չունեցող անձանց նկատմամբ։
ՈՒԿՐԱԻՆԱՅԻ ՆԱԽԱԳԱՀՆ ԱՅՑԵԼԵԼ Է ԲՈՒՉԱ
Ուկրաինայի նախագահ Վոլոդիմիր Զելենսկին այցելել է Կիևի շրջանի Բուչա քաղաք, որտեղ հայտնաբերվել են տասնյակ զոհված խաղաղ բնակիչների դիեր։
Լրագրողների հետ հարցազրույցում Զելենսկին հայտարարել է, որ Ռուսաստանը ռազմական հանցագործություններ է իրականացրել Ուկրաինայում, ինչը, նրա խոսքով, բարդացնում է բանակցային գործընթացը։
ՌՈՒՍ ԶԻՆՎՈՐԱԿԱՆՆԵՐԸ ԼՔԵԼ ԵՆ ԲՈՒՉԱՆ ԴԵՌ ՄԱՐՏԻ 30-ԻՆ. ՌԴ ՊՆ
Մոսկվան կտրականապես հերքում է բոլոր մեղադրանքները և սրանք որակում է հերթական սադրանք: ՌԴ պաշտպանության նախարարությունից հայտնում են՝ ռուս զինվորականները լքել են Բուչան դեռ մարտի 30-ին։ Արտգործնախարար Սերգեյ Լավրովն էլ տեղի ունեցածը «ֆեյքերի հարձակում» է անվանել։
«Ուկրաինան և Արևմուտքը փորձում են այս բեմադրությունն օգտագործել հակառուսական նպատակներով»,- նշել է նախարարը։
Բուչայում տեղի ունեցածի ֆոնին ԱՄՆ նախագահ Ջո Բայդենը Վլադիմիր Պուտինին կրկին ռազմական հանցագործ է անվանել: Նա խոստացել է ընդլայնել Մոսկվայի դեմ պատժամիջոցները և կոչ արել Պուտինին քրեական պատասխանատվության ենթարկել։
Արձագանքելով Բայդենի խոսքին՝ ՌԴ ԱԳՆ ներկայացուցիչ Մարիա Զախարովան նշել է, որ Վաշինգտոնը նախ պետք է հետաքննի Հարավսլավիայի ռմբակոծությունը, Իրաքի օկուպացիան, Սրեբրենիցայի և Կոսովոյի դեպքերը, ինչպես նաև Ճապոնիային ատոմային հարվածները։
ԱՄՆ-Ը ՉԻ ՀԱՄԱՁԱՅՆԵԼ ԱՆՎՏԱՆԳՈՒԹՅԱՆ ԵՐԱՇԽԻՔՆԵՐ ՏՐԱՄԱԴՐԵԼ ԿԻԵՎԻՆ
Վաշինգտոնն այդպես էլ չի համաձայնել անվտանգության այնպիսի երաշխիքներ տրամադրել Ուկրաինային, որոնք ցանկանում էր Կիևը՝ հայտարարել է Վոլոդիմիր Զելենսկին։
«Մենք դեռևս ոչ մի երկրից դրանք չենք ստացել»,- նշել է նա CBS հեռուստաալիքին տված հարցազրույցում:
Կիևը պնդում է՝ անվտանգության երաշխիքները ենթադրում են Ուկրաինայի վրա հարձակման դեպքում ռազմական օգնություն տրամադրելու պատրաստակամություն։ Նախագահը միաժամանակ կարծիք է հայտնել, որ ՆԱՏՕ-ի անդամ երկրները Կիևին ռազմական ինքնաթիռներ չեն տրամադրի։
«Դաշինքի երկրները հայտարարում են, որ չեն կարող այս պատերազմի մաս լինել»,- ընդգծել է Զելենսկին։
Նախագահն անդրադարձել է նաև ռուս-ուկրաինական բանակցություններին, նշել՝ Կիևի և Մոսկվայի ներկայացուցիչները մոտ են պայմանավորվածություններ ձեռք բերելուն, այդ թվում՝ երկրի ոչ միջուկային, ոչ դաշինքային և չեզոք կարգավիճակի հարցերում։ Նա միևնույն ժամանակ վստահություն է հայտնել, որ Կիևն անդամակցելու է ԵՄ-ին։
Բանակցություններում ռուսական պատվիրակության ղեկավար Վլադիմիր Մեդինսկին նախօրեին հայտարարել է, որ Ռուսաստանի և Ուկրաինայի միջև համաձայնագրի նախագիծը դեռ պատրաստ չէ՝ դրանք երկու երկրի ղեկավարներին ներկայացնելու համար։
Կրեմլի խոսնակ Դմիտրի Պեսկովն էլ հայտարարել է, որ Ռուսաստանը մեծ հաճույքով կշարունակի Ուկրաինայի հետ բանակցությունները Բելառուսում, սակայն Կիևը դեմ է դրան։ Նա, այնուհանդերձ, շեշտել է Ուկրաինայի հետ ընդհանուր դիրքորոշումներ գտնելու կարևորությունը՝ անկախ բանակցությունների անցկացման վայրից։
ՆՎԱԶԵՑՎՈՒՄ Է ՌԴ-Ի ՀԵՏ ԴԻՎԱՆԱԳԻՏԱԿԱՆ ՀԱՐԱԲԵՐՈՒԹՅԱՆ ՄԱԿԱՐԴԱԿԸ
Լիտվան նվազեցնում է Ռուսաստանի հետ դիվանագիտական հարաբերությունների մակարդակը. Վիլնյուսն առաջինը Եվրոպայում որոշում է կայացրել հետ կանչել իր դեսպանին Մոսկվայից և պահանջել երկրում Ռուսաստանի դեսպանից` լքել Լիտվայի տարածքը։ Այդ մասին հայտարարել է արտաքին գործերի նախարար Գաբրիելիուս Լանդսբերգիսը։
«Իշխանությունները դիտարկում են նաև Ռուսաստանի և Բելառուսի հետ սահմանը փակելու հարցը։ Իսկ պատժամիջոցների արդյունավետության համար անհրաժեշտ է հրաժարվել ռուսական նավթից»,- հավելել է նա։
Լիտվայի օրինակին է հետևել Լատվիան։ Ռիգան նույնպես նվազեցնում է Մոսկվայի հետ դիվանագիտական հարաբերությունների մակարդակը՝ տեղեկացրել է արտգործնախարար Էդգար Ռինկևիչը։
Մոսկվան արձագանքել է:
«Ռուսաստանի պատասխանն այս գործողություններին չի ուշանա»,- զգուշացրել է ՌԴ ԱԳՆ ներկայացուցիչ Մարիա Զախարովան:
ԵՄ-Ն ԿԽՍՏԱՑՆԻ ՌԴ-Ի ՆԿԱՏՄԱՄԲ ՊԱՏԺԱՄԻՋՈՑՆԵՐԸ
Եվրամիությունը կխստացնի Ռուսաստանի դեմ պատժամիջոցները։ Այդ մասին հայտարարել է Գերմանիայի արտգործնախարար Աննալենա Բերբոքը։ Նրա խոսքով՝ Գերմանիան հանդես է եկել մի շարք առաջարկներով։
Երկրի ֆինանսների նախարար Քրիստիան Լինդներն էլ կարծիք է հայտնել, որ ռուսական գազից կտրուկ հրաժարվելը ավելի շատ կվնասի Եվրամիությանը, քան Ռուսաստանին։
«Մեր նպատակն է՝ որքան հնարավոր է շուտ անկախանալ ռուսական էներգակիրներից: Բայց ռուսական գազն այս պահին անփոխարինելի է»,- ընդգծել է պաշտոնյան։
Նա հանդես է եկել Մոսկվայի հետ բոլոր տնտեսական հարաբերությունների խզման օգտին։
Ռուսաստանից գազի մատակարարումների էմբարգոյին դեմ է արտահայտվել Ավստրիայի արտաքին գործերի նախարար Ալեքսանդր Շալենբերգը։
«Մենք չպետք է սխալվենք, պատժամիջոցները խստացնելու այլ տարբերակներ կան, և մենք դրանք օգտագործում ենք»,- նշել է նա։
Ավելի վաղ Լեհաստանի վարչապետ Մատեուշ Մորավեցկին քննադատել էր պաշտոնական Բեռլինին՝ հայտարարելով, որ Գերմանիան դժվարություններ է ստեղծում, երբ Ռուսաստանի դեմ պատժամիջոցները խստացնելու մասին հարց է բարձրացվում:
