ՄԵԾ ԲՐԻՏԱՆԻԱՆ ՄՏԱԴԻՐ Է ԽՍՏԱՑՆԵԼ ՌԴ ՆԿԱՏՄԱՄԲ ՊԱՏԺԱՄԻՋՈՑՆԵՐԸ
Մեծ Բրիտանիայի կառավարությունը մտադիր է խստացնել Ռուսաստանի դեմ պատժամիջոցները և մեծացնել Կիևին տրամադրվող ռազմական և հումանիտար աջակցությունը։ Այդ մասին հայտարարել է Մեծ Բրիտանիայի վարչապետ Բորիս Ջոնսոնը։
Նա նաև մեղադրել է ռուսական կողմին Կիևի շրջանի Բուչա քաղաքում խաղաղ բնակչությանը թիրախավորելու համար, նշել՝ Լոնդոնը լրացուցիչ ֆինանսական աջակցության կհատկացնի դեպքի հանգամանքները պարզելու և Ուկրաինա փորձագետներ ուղարկելու համար։
ՌՈՒՍ ԶԻՆՎՈՐԱԿԱՆՆԵՐԸ ԼՔԵԼ ԵՆ ԲՈՒՉԱՆ ԴԵՌ ՄԱՐՏԻ 30-ԻՆ. ՌԴ ՊՆ
Մոսկվան սադրանք է որակում Բուչայում քաղաքացիական անձանց սպանության համար ռուսական կողմին ուղղվող մեղադրանքները: ՌԴ պաշտպանության նախարարությունից հայտնում են՝ ռուս զինվորականները լքել են Բուչան դեռ մարտի 30-ին։ Ստեղծված իրավիճակի ֆոնին Ռուսաստանը պահանջել է ապրիլի 4-ին ՄԱԿ-ի Անվտանգության խորհրդի նիստ գումարել, Լոնդոնն իր համաձայնությունը չի տվել։ ՌԴ ԱԳՆ պաշտոնական ներկայացուցիչ Մարիա Զախարովան հայտնել է, որ Մոսկվան կրկին կդիմի ՄԱԿ-ի ԱԽ՝ արտակարգ նիստ անցկացնելու պահանջով։
Արտգործնախարար Սերգեյ Լավրովն էլ ստեղծված իրավիճակը «ֆեյքերի հարձակում» է որակել։ «Ուկրաինան և Արևմուտքը փորձում են այս բեմադրությունն օգտագործել հակառուսական նպատակներով»,- նշել է նա Մոսկվայում ՄԱԿ-ի գլխավոր քարտուղարի հումանիտար հարցերով տեղակալ Մարտին Գրիֆիթսի հետ հանդիպման ժամանակ։
ԵՄ-Ն ՆՈՐ ՊԱՏԺԱՄԻՋՈՑՆԵՐ Է ՆԱԽԱՊԱՏՐԱՍՏՈՒՄ ՌԴ ՆԿԱՏՄԱՄԲ. ՄԻՇԵԼ
Գերմանիան դժվարություններ է ստեղծում, երբ Ռուսաստանի դեմ պատժամիջոցները խստացնելու մասին հարց է բարձրացվում, հայտարարել է Լեհաստանի վարչապետ Մատեուշ Մորավեցկին՝ շեշտելով՝ Հունգարիան կողմ է Մոսկվայի նկատմամբ ճնշումը մեծացնելուն։
Կրեմլից արձագանքում են՝ վերջին շրջանում Լեհաստանի ղեկավարության դիրքորոշումը լուրջ մտահոգություն է առաջացնում։ «Այն ծայրաստիճան ռազմատենչ է և հակառուսական։ Այդ գործողությունները կարող են հանգեցնել տարածաշրջանում լարվածության աճին»,- նշել է ՌԴ մամուլի խոսնակ Դմիտրի Պեսկովը:
Նախօրեին Եվրոպական խորհրդի նախագահ Շառլ Միշելը հայտարարել է, որ ԵՄ իշխանությունները նոր պատժամիջոցներ են նախապատրաստում Ռուսաստանի դեմ։ Ֆրանսիայի նախագահ Էմանուել Մակրոն նույնպես հանդես է եկել դրանց խստացման օգտին։ Նրա խոսքով՝ նոր պատժամիջոցները պետք է տարածվեն Ռուսաստանից ածխի և նավթամթերքի մատակարարումների վրա։ Մակրոնը, միևնույն ժամանակ, խոստովանել է՝ դա չափազանց ցավոտ կլինի Ֆրանսիայի համար։ Նախագահը նաև չի բացառել, որ Փարիզը Մոսկվայի դեմ միակողմանի սահմանափակումներ կարող է կիրառել։
«ԲԱՅՐԱՔԹԱՐՆԵՐԻ» ՄԱՏԱԿԱՐԱՐՈՒՄԸ ՌԴ-ՈՒՄ ՑԱՎՈՎ ԵՆ ԸՆԴՈՒՆՈՒՄ. ԵՐԽՈՎ
Ուկրաինա թուրքական «Բայրաքթար» անօդաչու թռչող սարքերի մատակարարումը Ռուսաստանում ցավով են ընդունում։ Այդ մասին հայտարարել է Թուրքիայում Ռուսաստանի դեսպան Ալեքսեյ Երխովը։
«Պարզաբանումը թե «բիզնեսը մնում է բիզնես» ռուս հասարակությունը չի ընդունում, քանի որ թուրքական անօդաչուները սպանում են մեր զինվորներին»,- ընդգծել է դիվանագետը։
Երխովը, միաժամանակ, նշել է, որ Ռուսաստանը զենք չի տրամադրում այն երկրներին, որոնց հետ կռվում է թուրքական բանակը, և Թուրքիան դա լավ գիտի։
ԱՄՆ ՊԵՏՔԱՐՏՈՒՂԱՐԸ՝ ՌԴ ԴԵՄ ՊԱՏԺԱՄԻՋՈՑՆԵՐԸ ՉԵՂԱՐԿԵԼՈՒ ՄԱՍԻՆ
Ռուսաստանի դեմ պատժամիջոցները կարող են չեղարկվել, եթե Մոսկվայի և Կիևի ներկայացուցիչների միջև բանակցությունների արդյունքում ռազմական գործողությունները դադարեցվեն, հայտնել է ԱՄՆ պետքարտուղարը։
«Մենք կհետևենքմ թե ինչ կանի և ինչ կուզի Ուկրաինան։ Պատժամիջոցների հիմնական նպատակը Ռուսաստանի քաղաքականությունը փոխելն է»,- շեշտել է Էնթոնի Բլինքենը։
Պետքարտուղարին խնդրել են մեկնաբանել լուրերն այն մասին, թե ԱՄՆ իշխանությունները փորձում են նպաստել Ուկրաինա խորհրդային արտադրության տանկերի տեղափոխմանը։
«Չեմ կարող խոսել կոնկրետ համակարգերի մասին, բայց կարող եմ ասել, որ մենք աշխատում ենք գործընկերների հետ՝ ապահովելու Ուկրաինային անհրաժեշտ համակարգերի տրամադրումը»,- ասել է նա։
Մարտի 30-ին Կիևը դիմել էր Վաշինգտոնին հակատանկային հրթիռներ, հրետանային, զենիթահրթիռային համակարգեր, ինչպես նաև մարտական ինքնաթիռներ, այդ թվում՝ ռուսական արտադրության Սու-25-եր տրամադրելու խնդրանքով: Ավելի վաղ ՌԴ ԱԳ նախարար Սերգեյ Լավրովը հայտարարել էր, որ խորհրդային և ռուսական հակահրթիռային պաշտպանության համակարգերն, ըստ պայմանագրերի, չեն կարող փոխանցվել երրորդ երկրներին։
ԵՄ-Ն ԿԱՐԵՎՈՐՈՒՄ Է ՌԴ ՀԵՏ ՀԱՂՈՐԴԱԿՑՈՒԹՅԱՆ ՇԱՐՈՒՆԱԿՈՒՄԸ. ՍՏԱՆՈ
Եվրամիությունը, չնայած Ռուսաստանի դեմ պատժամիջոցներին, կարևորում է Մոսկվայի հետ հաղորդակցության շարունակումը՝ Ուկրաինայի շուրջ իրադրությունը կարգավորելու համար։ Նման համոզմունք է հայտնել ԵՄ-ի արտաքին քաղաքական ծառայության պաշտոնական ներկայացուցիչ Պետեր Ստանոն։
«Պատժամիջոցներն ու մեկուսացումը չեն նշանակում, որ շփումները պետք է դադարեցվեն, մեզ համար երկխոսությունը միշտ առաջնահերթություն է»,- նշել է նա։
Ստանոյի խոսքով՝ «հաղորդակցությունն իրականացվում է տարբեր խողովակներով»։
ՆԱՏՕ-Ն ԿՐԿՆԱՊԱՏԿԵԼ Է ՌԱԶՄԱԿԱՆ ՆԵՐԿԱՅՈՒԹՅՈՒՆԸ ԲԱԼԹՅԱՆ ԵՐԿՐՆԵՐՈՒՄ
ՆԱՏՕ-ն կրկնապատկել է իր ռազմական ներկայությունը Բալթյան երկրներում։ Այդ մասին հայտարարել է Լիտվայի պաշտպանության նախարար Արվիդաս Անուշաուսկասը։
Նրա խոսքով՝ Լեհաստանում դաշինքի ուժերը ավելացվել են 10 անգամ։
«Անընդհատ նոր ուժեր են տեղակայվում։ Գործընթացը գագաթնակետին կհասնի մայիսին։ Թե որքան այս ստորաբաժանումները կմնան Լիտվայում, կախված է տարածաշրջանում անվտանգային իրավիճակից»,- նշել է նախարարը։
Մայիսին Լիտվայում միջազգային խոշոր զորավարժություններ են նախատեսված։
