Մի քանի օր առաջ ՊԵԿ-ը հայտարարություն տարածեց, ըստ որի՝ քրեական գործի շրջանակներում, որը հարուցված էր Զանգեզուրի պղնձամոլիբդենային կոմբինատի կողմից հարկային պարտավորությունները չկատարելու հետ, բյուջե է վերականգնվել 15 մլրդ դրամ: ՊԵԿ նախագահ Ռուստամ Բադասյանը նշել էր, որ կոռուպցիոն սխեմայի հետևանքով է պետությանը խոշոր վնաս պատճառվել:
ԱԺ նիստի ընթացքում Արծվիկ Մինասյանը ՊԵԿ նախագահին հարց ուղղեց թեմայի վերաբերյալ՝ խնդրելով հրապարակել կոռուպցիոն սխեմայի մեջ ներգրավված անձանց անունները, և արդյոք դրանք առնչություն ունե՞ն քաղաքական դաշտի հետ:
«Եղել է բազմադրվագ քրեական գործ, դրա քննությունը դեռևս շարունակվում է: Դրվագներից մեկը վերաբերում է Զանգեզուրի պղնձամոլիբդենային կոմբինատի հարկային պարտավորություններին, որոնք առաջացել են 2016-2017 թվականներին կնքված սթրիմինգային պայմանագրերի հիմքով: Այդ պայմանագրերի միջոցով հարկման բազայի քայքայման սխեմա է կիրառվել»,- ասաց Բադասյանը:
Նա նշեց, որ այդ քրեական գործը վերաբերում է նաև կոռուպցիոն տարատեսակ դրվագներին:
«Մենք խոսել ենք 15 մլրդ դրամի վերականգնման մասին, իսկ Զանգեզուրի պղնձամոլիբդենային կոմբինատի բաժնետոմսերը տարբեր ժամանակահատվածում, ըստ քրգործով ձեռք բերված տեղեկությունների, կապված են տարբեր քաղաքական դերակատարում ունեցող անձանց, շոշափվում են տարբեր անուններ»,- ասաց Բադասյանը:
