Երևանի քաղաքապետարանն ու 28 տնտեսվարող հնարավոր է հակամրցակցային համաձայնության վարքագիծ են դրսևորել մայրաքաղաքի ասֆալտապատման համար հայտարարված մրցույթների ընթացքում: Այսպիսի եզրակացության է եկել Մրցակցության պաշտպանության հանձնաժողովը՝ ուսումնասիրելով 2017-21թթ. պետական գնումների շրջանակում հայտարարված մրցույթները, ներկայացված գնային առաջարկներն ու փաստաթղթերը:
Դավիթ Հովհաննիսյան, ՀՀ ՄՊՀ գլխավոր քարտուղարի տեղակալ - Նկատելի էր, որ մասնակից ընկերությունների, բացառությամբ առաջին՝ հաղթող ճանաչված ընկերության, գնային առաջարկները տատանվել էին նույն տոկոսային հարաբերության շրջանակներում, որը կարող էր ենթադրել, որ այս կարգով նրանք ապահովել են մեկ ընկերությանը որպես հաղթող ճանաչվել:
Դավիթ Հովհաննիսյանը հավելեց՝ հաղթող ճանաչվող ընկերությունը հաջորդ մրցույթին ներկայացրել է արդեն այնպիսի գնային առաջարկ, որ զրոյանար նորից հաղթելու հավանականությունը:
Դավիթ Հովհաննիսյան - Կարելի էր այստեղ եզրակացնել, որ կար բաժանում ընկերությունների միջև, թե որ մրցույթին, որ չափաբաժնին պետք է որ ընկերությունը հաղթող ճանաչվի:
Ինչ վերաբերում է Երևանի քաղաքապետարանին, ապա, ըստ հանձնաժողովի ուսումնասիրության, քաղաքապետարանը հնարավոր է նախապես բացահայտել է, թե կոնկրետ որ տեղանքի ասֆալտապատման համար է մրցույթն անցկացվելու:
Դավիթ Հովհաննիսյան - Կարող ենք ենթադրել, որ կար համակարգում քաղաքապետարանի կողմից, թե որտեղ պետք է լինի և, չնայած որ հայտում նման փաստ չկա, նախնական իմանալով ընկերությունները, թե որ վարչական տարածքում են լինելու աշխատանքները, գնային առաջարկները ներկայացնեին ըստ այդ վարչական տարածքի:
Մրցակցության պաշտպանության հանձնաժողովը վարույթը հարուցել է դեկտեմբերի 14-ին: Հավաստիացնում են՝ որոշումն առաքված է բոլոր կողմերին:
Դավիթ Հովհաննիսյան - Հանձնաժողովը կհրավիրի մասնակիցներին, կլսի նրանց կարծիքները, փաստերն ու փաստարկները, որից հետո, անհրաժեշտության դեպքում, նորից կարող է ուսումնասիրություն լինել և վերջնական արդյունքը կլինի: Ամեն դեպքում, բազմակողմանի, օբյեկտիվ ուսումնասիրության հիմնական գաղափարախոսությունն այն է, որ բոլոր կողմերն իրենց հակափաստարկներն ու փաստարկները կարող են ներկայացնել հանձնաժողովին:
Հակամրցակցային գործունեության դեպքում պատասխանատվություն է սահմանված, թե՛ տնտեսվարողների, թե՛ պաշտոնյաների համար:
Դավիթ Հովհաննիսյան - Եթե պարզվի, որ առաջին փաստով կա հակամրցակցային համաձայնություն տնտեսվարողների միջև, ապա Մրցակցության պաշտպանության օրենքի համաձայն՝ շրջանառության 10%-ի չափով: Ի դեպ ասեմ, որ սա ամենավտանգավոր խախտումն է, որ կարող են երբևէ իրականացնել տնտեսվարող սուբյեկտները, երկրորդ դեպքում՝ պաշտոնատար անձի նկատմամբ կարող է սահմանվել վարչական պատասխանատվություն՝ նվազագույն աշխատավարձի 3000-5000-ապատիկի չափով:
Վարույթի վերաբերյալ փորձեցինք մեկնաբանություն ստանալ նաև Երևանի քաղաքապետի մամուլի խոսնակից, նա խնդրեց դիմել գրավոր:
Հեղինակ՝ Նորայր Շողիկյան
