ԲԱՅԴԵՆԸ ԱՇԽԱՐՀԻՆ ԳՈՐԾԱԿՑՈՒԹՅԱՆ ԿՈՉ Է ԱՐԵԼ
ՄԱԿ-ի Գլխավոր վեհաժողովի 76-րդ նստաշրջանի ընթացքում առաջին անգամ որպես Միացյալ Նահանգների նախագահ ելույթ է ունեցել Ջո Բայդենը: Գլոբալ մարտահրավերներին դիմակայելու համար նա աշխարհին գործակցության կոչ է արել: Այս պատմական բեկումնային փուլում ԱՄՆ-ը դիվանագիտության ժամանակաշրջան է սկսում՝ ասել է Բայդենը: Առնաց Չինաստանի անունը նշելու՝ նա մտահոգություն է հայտնել երկու երկրի միջև լարվածության աճի կապակցությամբ ու ընդգծել, որ Վաշինգտոնը նոր սառը պատերազմի ցանկություն չունի:
Տեսակապով ելույթ է ունեցել նաև Իրանի նախագահ Էբրահիմ Ռայիսին և ընդգծել Թեհրանի քաղաքականությունը, այն է՝ տարածաշրջանի բոլոր երկրների կայունության ու տարածքային ամբողջականության պահպանում: ՄԱԿ-ի ԳՎ նստաշրջանը կավարտվի սեպտեմբերի 27-ին:
ԲԼԻՆՔԵՆՆ ՈՒ ՉԱՎՈՒՇՕՂԼՈՒՆ ՔՆՆԱՐԿԵԼ ԵՆ ԻՐԱՎԻՃԱԿԸ ԼՂ-ՈՒՄ
ՄԱԿ-ի Գլխավոր վեհաժողովի շրջանակում ԱՄՆ պետքարտուղար Էնթոնի Բլինքենը Թուրքիայի արտգործնախարար Մևլութ Չավուշօղլուի հետ քննարկել է իրավիճակը Լեռնային Ղարաբաղում: «Հանդիպումը, որը տեղի ունեցավ կեսօրին Թուրքիայի ԱԳ նախարար Չավուշօղլուի հետ, տևեց մոտ մեկ ժամ: Իհարկե, նրանք քննարկեցին Աֆղանստանը, խոսեցին նաև Սիրիայի մասին: Բացի դրանից՝ նրանք համեմատաբար երկար զրույց ունեցան Կովկասի՝ Հայաստանի, Ադրբեջանի և Լեռնային Ղարաբաղի մասին»,- նշված է ԱՄՆ Պետքարտուղարության հաղորդագրության մեջ՝ առանց մանրամասնելու զրույցի բովանդակությունը: Նյու Յորքում կայացել է նաև Միացյալ Նահանգների պետքարտուղարի տեղակալ Վիկտորիա Նուլանդի հանդիպումը Ադրբեջանի արտաքին գործերի նախարար Ջեյհուն Բայրամովի հետ։ Քննարկվել է Լեռնային Ղարաբաղի շուրջ ձեռք բերված պայմանավորվածությունների իրականացման ընթացքը։
ՊԱՏՐԱՍՏ ԵՆՔ ԽԱՂԱՂԱՊԱՀ ԴԵՐԱԿԱՏԱՐՈՒՄ ՈՒՆԵՆԱԼ. ՂԱՐԻԲԱՇՎԻԼԻ
Նյու Յորքում Հարավային Կովկասում տիրող իրավիճակը քննարկել են Թուրքիայի նախագահ Ռեջեփ Թայիփ Էրդողանն ու Վրաստանի վարչապետ Իրակլի Ղարիբաշվիլին: Երկու երկրի ղեկավարները խոսել են ականապատ տարածքների քարտեզների դիմաց Ադրբեջանի կողմից 15 հայ ռազմագերիների՝ Վրաստանի կառավարության միջնորդությամբ իրականացված վերադարձի մասին։ «Ղարիբաշվիլին և Էրդողանն ընդգծել են, որ այդ փոխանակումը հարևանների միջև գործակցության լավ հիմք է »,- նշված է մամուլի հաղորդագրության մեջ։
«Վրաստանի կարևորագույն խնդիրը տարածաշրջանում խաղաղության և կայունության պահպանումն է։ Մեր երկիրը պատրաստ է խաղաղապահ դերակատարում ունենալ՝ հանուն կովկասյան տարածաշրջանում երկարաժամկետ խաղաղության և կայունության հաստատման»,- դիմելով Էրդողանին` հայտարարել է Վրաստանի վարչապետը։
ՎՐԱՍՏԱՆԸ ՇՆՈՐՀԱՎՈՐԵԼ Է ՀԱՅԱՍՏԱՆԻՆ
Հայաստանի անկախության օրվա կապակցությամբ շնորհավորանքները չեն դադարում: Վրաստանի արտաքին գործերի նախարարության շնորհավորական ուղերձում նշված է. «Ամենաանկեղծ շնորհավորանքները բարեկամ Հայաստանին՝ Անկախության տոնի առթիվ: Վրաստանը բարօրություն, կայունություն և բարգավաճում է մաղթում Հայաստանի ժողովրդին, որ այսօր նշում է Անկախության 30-ամյակը»:
ՓԱԼՈՆՆ ԸՆԴԳԾԵԼ Է ՀՀ-ՈՒՄ ԳՐԱՆՑՎԱԾ ԱՌԱՋԸՆԹԱՑԸ
ԱՄՆ Կոնգրեսի հայկական հարցերի հանձնախմբի համանախագահ Ֆրենկ Փալոնը շնորհավորական ուղերձում ընդգծել է այն զգալի առաջընթացը, որ Հայաստանը արձանագրել է 1990-ական թվականներին տեղի ունեցած իր առաջին հայաստանյան այցելությունից ի վեր: «2018-ի թավշյա հեղափոխությունը ոգեշնչող էր»,- ասել է ամերիկացի կոնգրեսականը՝ նշելով, որ Փաշինյանի կառավարությունը շարունակում է ցուցադրել իր անկեղծ մտադրությունը՝ քաղաքացիական հասարակության և ժողովրդավարական ինստիտուտների բարելավման, այդ թվում դատական համակարգի ընթացիկ բարեփոխումների ուղղությամբ: Փալոնը անչափ ոգևորված է այն փաստով, որ Կոնգրեսի Հայկական հարցերի հանձնախմբի քրտնաջան աշխատանքի շնորհիվ Կոնգրեսի 2021 թ. ֆինանսավորման օրինագծում ներառվել է 50 միլիոն դոլարի օգնություն Հայաստանին և լրացուցիչ օգնություն՝ Արցախում ականազերծման աշխատանքների նպատակով:
ՀԱՅԱՍՏԱՆԸ ՔՈՒՅՐ Է ՖՐԱՆՍԻԱՅԻ ՀԱՄԱՐ. ԲՈՒԱՅԵ
Հայաստանի անկախության այս օրը չմոռանանք այն կապերը, որոնք միավորում են մեր երկու երկրներին։ «Այս Հայաստանը՝ հարուստ ավելի քան 2000 տարվա պատմություն ունեցող մշակույթով և հզոր ինքնությամբ, այս Հայաստանը, որը պայքարել է Ֆրանսիայի կողքին մեր ազատությունների համար, հաղթահարել է պատմության փորձությունը, ինչպես և Ֆրանսիան»: Այսպես է Հայաստանի անկախության 30-ամյակը շնորհավորել ֆրանսիացի քաղաքական գործիչ, պատգամավոր Վալերի Բուայեն: Բուայեի խոսքով՝ Հայաստանը, ինչպես և Ֆրանսիան, կոփվել է պատմության քննության մեջ:
«Այսօր, ինչպեսև երեկ, Հայաստանը պայքարում է իր և իր ժողովրդի գոյատևման համար՝ ընդդեմ Ադրբեջանի և Թուրքիայի: Ես հայուհի չեմ, բայց որպես ֆրանսիացի ուզում եմ ասել, որ Հայաստանը քույր է Ֆրանսիայի համար: Հուսով եմ, որ նա կարող է, ապավինել մեր լիակատար աջակցությանը»,- գրել է Բուայեն:
