Ռուսաստանի, Հայաստանի և Ադրբեջանի միջև պայմանավորվածությունների իրականացման գործընթացը վատ չի ընթանում, ՌԴ նախագահը մշտական կապի մեջ է Ադրբեջանի նախագահի և Հայաստանի վարչապետի պաշտոնակատարի հետ՝ հայտարարել է ՌԴ նախագահի մամուլի քարտուղար Դմիտրի Պեսկովը: «Գիտեք, որ եռակողմ պայմանավորվածությունները կազմվել են նախագահ Պուտինի եռանդուն մասնակցությամբ և նրանք նույն կերպ էլ իրականացվում են, հիմա զբաղվում ենք հենց դրանց կյանքի կոչմամբ»,- ասել է ՌԴ նախագահի մամուլի քարտուղարն ու ընդգծել, որ Մոսկվան պատրաստ է ողջունել Ֆրանսիայի և ԵՄ երկրների ջանքերը Լեռնային Ղարաբաղի հարցով բանակցություններում, եթե դրանք նպաստեն առկա պայմանավորվածությունների իրագործմանը:
*****
Մեծ Բրիտանիայի Համայնքների պալատի անդամ Ռուպա Հուքը կոչ է արել Արտաքին գործերի, համագործակցության և զարգացման նախարար Դոմինիկ Ռաաբին ճանաչել Հայոց ցեղասպանությունը: «Ժամանակն է, որ Մեծ Բրիտանիայի կառավարությունը միանա ավելի քան 30 երկրներին, ներառյալ ԱՄՆ-ին՝ պաշտոնապես ճանաչելու 1915-1923 թվականներին Օսմանյան կայսրության կողմից երկու միլիոն հայերի ոչնչացումը որպես ցեղասպանություն»,- ասել է Ռուպա Հուքը։ «Այսօր ես Արտաքին գործերի նախարար Դոմինիկ Ռաաբին կոչ արեցի ճանաչել Հայոց ցեղասպանությունը: Նա ասաց, որ դիրքորոշումը մնում է անփոփոխ, բայց կարծես լուռ ընդունեց, որ դա ցեղասպանություն է»,- նիստից հետո Ֆեյսբուքում գրել է Հուքը:
*****
Վրաստանում կանցկացվեն Agile Spirit 2021 միջազգային զորավարժությունները, որոնց, բացի Վրաստանից ու Միացյալ Նահանգներից, կմասնակցեն ՆԱՏՕ-ի 13 երկրի ու գործընկեր պետության զինծառայողներ: Զորավարժությունների մասնակից երկրների ցանկում են նաև Թուրքիան և Ադրբեջանը: Ընդհանուր առմամբ՝ զորավարժություններին կմասնակցեն ավելի քան 2,5 հազար զինվորականներ։ Ուսումնական վարժանքները կանցկացվեն հուլիսի 26-ից օգոստոսի 6-ը: Դրանք ներառում են թիմային ուսուցում, դաշտային մարզումներ ու մարտական հրաձգություն վարժություններ: Agile Spirit զորավարժությունները Վրաստանում կանցկացվեն տասներորդ անգամ:
*****
ԱՄՆ Սենատի արտաքին հարաբերությունների հանձնաժողովի նախագահ Ռոբերտ Մենենդեսը Սենատի լսումների ժամանակ անդրադարձել է Ադրբեջանին տրվող օգնությանը, առաջարկել ընդունել այն կրճատելու վերաբերյալ ուղղումը: «Ադրբեջանն այժմ սահմանային վեճի արդյունքում ներխուժել է Հայաստանի ֆիզիկական տարածք, և ես կարծում եմ՝ նրանք կշարունակեն իրենց ագրեսիվ վարքագիծը, քանի դեռ հստակ ուղերձ չեն ստացել, որ դա անընդունելի է»,- նշել է Մենենդեսը: Եվրոպայի և Եվրասիայի հարցերի պետքարտուղարի տեղակալի պաշտոնի թեկնածու Քերըն Դոնֆրայդն ասել է, որ եթե այդ տեղեկությունը հաստատվի, ինքն այդ հարցով սերտորեն կգործակցի Մենենդեսի և Սենատի արտաքին հարաբերությունների հանձնաժողովի հետ: «Խիստ անհրաժեշտ է վստահ լինել, որ ցանկացած աջակցություն, որ մենք տրամադրում ենք Ադրբեջանին, որևէ կերպ չի խաթարում ուժերի հավասարակշռությունը, և որ մենք հանձնառու ենք Լեռնային Ղարաբաղի հարցի կարգավորմանը»,- ասել է Դոնֆրայդը:
*****
Ֆրանսիայի նախագահ Էմանուել Մակրոնի հեռախոսահամարը Մարոկկոյի հատուկ ծառայությունների կողմից ներառվել է իսրայելական Pegasus համակարգում՝ նրան լրտեսելու համար: OCCRP հետաքննական նախագծի սկանդալային զեկույցը, ըստ որի 10 երկիր, նաև նրանց կառավարությունները գաղտնալսել են լրագրողների, պաշտոնյաների և ընդդիմադիրների, բացահայտում է, որ նախագահ Մակրոնի և վարչապետ Էդուարդ Ֆիլիպի, նաև 14 նախարարների հեռախոսահամարները ներառվել են ցուցակում՝ Մարոկկոյի հատուկ ծառայությունների կողմից հնարավոր գաղտնալսման համար:
*****
Առողջապահության համաշխարհային կազմակերպության տնօրեն Թեդրոս Ադհանոմ Գեբրեյեսուսը նախազգուշացնում է կորոնավիրուսի ավելի վտանգավոր շտամի սպառնալիքի մասին: Այս մասին նա հայտարարել է այսօր՝ ելույթ ունենալով Տոկիոյում՝ Միջազգային օլիմպիական կոմիտեի (ՄՕԿ) 138-րդ նստաշրջանում: Նրա խոսքով՝ որքան շատ տարածվի վիրուսը, այնքան շատ տարբերակներ ի հայտ կգան և, հնարավոր է, նույնիսկ ավելի վտանգավոր դառնան, քան դելտա տարբերակը, որն այժմ մեծ վնաս է պատճառում: Առողջապահության համաշխարհային կազմակերպության տնօրենը հայտարարել է, որ եթե աշխարհի առաջատար տնտեսությունները ցանկանան, կարող են ամիսների ընթացքում վերահսկողության տակ առնել համաճարակը՝ կիսվելով պատվաստանյութով ու խթանելով դրանց արտադրությունը։