Խորհրդարանը երեկ չընդունեց ԱԺ արտահերթ նիստում ներկայացված օրենսդրական նախագծերը 24-ժամյա ռեժիմով ընդունելու առաջարկը: Այսօր ԱԺ տնտեսական հարցերի մշտական հանձնաժողովի նախագահ Բաբկեն Թունյանը մեկնաբանեց, որ միայն առաջին ընթերցմամբ քննարկված օրենսդրական նախագծերը, այդ թվում՝ «Անշարժ գույքի հարկով հարկման նպատակով անշարժ գույքի շուկայական արժեքին մոտարկված կադաստրային գնահատման կարգը սահմանելու մասին» օրենքում լրացումներ կատարելու մասին» օրենքում և ՀՀ հողային օրենսգրքով փոփոխությունների նախագիծը երկրորդ ընթերցմամբ կքննարկվեն արդեն հաջորդ տարի՝ դրանց տալով հետադարձ ուժ:
«Քանի որ սա շատ քաղաքացիների է վերաբերում, պարզաբանեմ՝ մենք ունեինք կադաստրային արժեքներին վերաբերող օրենքների նախագիծ, որոնցով առաջարկվում էր՝ եթե մարդիկ նախկինում հետագա վճարման պայմանով համայնքներից ձեռք են բերել անշարժ գույք, կարող են հետագայում դրա համար վճարել ու սեփականության իրավունք ստանալ ոչ թե նոր, բարձրացված կադաստրային արժեքներով, այլ գործող ավելի ցածր կադաստրային արժեքներով,- ասաց Թունյանը՝ հավելելով,- երեկ մենք օրենքն ընդունեցինք առաջին ընթերցմամբ, սակայն ԱԺ-ն, մասնավորապես, մեր հանձնաժողովն ուներ վերապահումներ, մասնավորապես, կառաջարկենք՝ երբ վճարումը կկատարվի 2021 թ. ընթացքում, մարդիկ կվճարեն հին կադաստրային արժեքով, եթե դրանից հետո՝ ապա ավելի թանկ:
Ցավոք, այդ փոփոխությունը չկարողացանք քննարկել, դա կանենք հունվարին՝ երկրորդ ընթերցմամբ: Կա մեկ այլ կարևոր խնդիր՝ ինքնակամ շինությունների օրինականացման վերաբերյալ: Կան հազարավոր քաղաքացիներ, որոնք ինքնակամ շինություններն օրինականացնելու համար դիմել են համայնքներին, մասնավորապես, Երևանի քաղաքապետարան, պրոցեսն ինչ-ինչ պատճառներով երկարաձգվել է, ու եթե որոշումը կայացվի դեկտեմբերի 31-ից հետո, այդ մարդիկ ստիպված են լինելու մի քանի անգամ ավելի վճարել, քան հիմա: Մենք այդ խնդրում կոնսենսուսի ենք եկել, որ պետք է լուծենք: Լուծման տարբերակը հետևյալն է՝ դիմումն ընդունելու պահին ինչ կադաստրային արժեք եղել է մարդկանց ինքնակամ շինություններն օրինականացվելու դեպքում, այդ արժեքով կվճարեն:
Հունվարին կլինի երկրորդ ընթերցումը, կընդունենք օրենքը, հետադարձ ուժ կտանք, քանի որ բարելավում նախատեսող օրենքներ են, որևէ անհանգստանալու բան չկա»:
Թունյանը նաև հավելեց, որ եթե երեկ հաստատվեր օրենքները 24-ժամյա ռեժիմով քննարկելու առաջարկը, իրենք այսօր առավոտյան հանձնաժողովի նիստ կանեին, փոփոխությունները կընդունեին:
«Բայց որ չեղավ, հանձնաժողովի նիստը կլինի հունվարին, ու այնպես կանենք, որ օրենքները հետադարձ ուժ ունենան»,- հավելեց նա:
