Ukrayna prezidenti Volodimir Zelenski Kiyevdə BBC-yə verdiyi müsahibədə atəşkəs və Rusiyaya güzəştlər barədə danışıb.
O, Ukraynanın müharibəni uduzmadığını və onu qələbə ilə başa vuracağını bildirib. O, Rusiyanın ələ keçirə bilmədiyi strateji əhəmiyyətli bölgələrdən Ukrayna qoşunlarının çıxarılmasını atəşkəs üçün ilkin şərt hesab edən Vladimir Putinin tələblərinin yerinə yetirilməsinə qəti şəkildə qarşı çıxıb.
"Putin artıq Üçüncü Dünya Müharibəsini başlatıb. Və cavab verməyin yeganə yolu onu geri çəkilməyə məcbur etmək üçün hərbi və iqtisadi təzyiqi artırmaqdır", - deyə Ukrayna prezidenti bildirib.
Jurnalist Zelenskinin atəşkəs müqaviləsi bağlamaq üçün Ukraynanın nəzarəti altında olan ərazinin 20%-nin (ukraynalıların "qala şəhərləri" adlandırdıqları bir sıra yaşayış məntəqələri), eləcə də Xerson və Zaporojye bölgələrinin digər hissələrinin təslim edilməsini tələb etməyin məqsədəuyğun olub-olmadığını soruşub.
“Mən sadəcə buna fərqli yanaşıram. Mən buna sadəcə torpaq, ərazi kimi baxmıram. Mən bunu geri çəkilmə, yəni mövqelərimizi zəiflətmək, orada yüz minlərlə insanımızı tərk etmək, bu geri çəkilmə ilə cəmiyyətimizi bölmək kimi baxıram”, - deyə Zelenski cavab verdi.
Ukrayna liderinin sözlərinə görə, daha geniş mənada qələbə Putindən qaynaqlanan qlobal təhlükənin aradan qaldırılmasıdır. “Sülhün qələbəsi üçün biz Putini dayandırmalıyıq, onun Ukraynanı işğal etməsinə icazə verməməliyik”, - deyə Zelenski yekunlaşdırdı.
