Prezident Donald Tramp Venesuelanın ABŞ-a 30-50 milyon barrel neft satacağını bildirib. Tramp həmin neftin satışından əldə olunan gəliri “hər iki ölkənin xalqının xeyrinə” istifadə edəcəyinə söz verib.
Ağ Evdə Venesueladakı vəziyyəti müzakirə etmək üçün cümə günü Amerika neft şirkətlərinin rəhbərləri ilə görüş keçirilir. AP xəbər verir ki, Tramp administrasiyası Karakasa ölkənin geniş, lakin çətin vəziyyətdə olan neft sənayesinə Amerika sərmayəsini təmin etmək üçün təzyiq edir. Məsələ ilə tanış olan anonim mənbənin sözlərinə görə, planları müzakirə etmək üçün Ağ Evdəki iclasda Exxon, Chevron və ConocoPhillips nümayəndələri iştirak edəcəklər.
Neftin bir barreli təxminən 56 dollardan ticarət edildiyi halda, çərşənbə axşamı Trampın elan etdiyi razılaşma 2,8 milyard dollar dəyərində ola bilər. ABŞ gündə orta hesabla təxminən 20 milyon barel neft və əlaqədar məhsullar tədarük edir, beləliklə, Venesuelanın tədarükü iki yarım günlük tədarükə bərabər olacaq.
Venesuela dünyanın ən böyük xam neft ehtiyatlarına malik olmasına baxmayaraq, gündə orta hesabla təxminən bir milyon barel hasil edir ki, bu da ABŞ-ın oktyabr ayında 13,9 milyon barel olan orta gündəlik hasilatından əhəmiyyətli dərəcədə aşağıdır.
