Մարտի 3-ին խորհրդարանը երկրորդ ընթերցմամբ քննարկել է մի շարք օրենքների նախագծեր:
««Զինվորական ծառայության և զինծառայողի կարգավիճակի մասին» օրենքում փոփոխություններ և լրացում կատարելու մասին» օրենքի նախագիծը ներկայացրել է ՀՀ պաշտպանության նախարար Սուրեն Պապիկյանը: Օրենքի նախագծով նախատեսվում է հստակեցնել զինծառայողների ատեստավորման գործընթացը, պարտադիր զինվորական ծառայությունից պայմանագրային զինվորական ծառայության ընդունված զինծառայողների հետագա պայմանագրային զինվորական ծառայության կազմակերպման հետ կապված հարաբերությունները:
Առաջինից երկրորդ ընթերցում ընկած ժամանակահատվածում նախագծի վերաբերյալ առաջարկներ չեն ներկայացվել:
ԱԺ պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը ներկայացրել է հանձնաժողովի դրական եզրակացությունը: Եզրափակիչ ելույթում Սուրեն Պապիկյանը նշել է, որ այսօր ամենաերաշխավորված մասնագիտությունը զինվորական մասնագիտությունն է և կոչ արել երիտասարդներին ու նրանց ծնողներին կողմնորոշվել հօգուտ զինվորական ծառայության և սպայի պատվաբեր դերի ու պաշտոնի:
Երկրորդ ընթերցմամբ քննարկվել են «Պատմության և մշակույթի անշարժ հուշարձանների ու պատմական միջավայրի պահպանության և օգտագործման մասին» ու կից ներկայացված օրենքներում առաջարկվող փոփոխությունները: Նախաձեռնության հեղինակներն են պատգամավորներ Թագուհի Ղազարյանը և Սիսակ Գաբրիելյանը: Վերջիններս առաջարկում են որոշակի սահմանափակումներ կրոնական բնույթի հուշարձանների սեփականության իրավունքի փոփոխության վերաբերյալ:
Հիմնական կարգավորումները՝ այստեղ:
Թագուհի Ղազարյանի տեղեկացմամբ առաջին ընթերցումից հետո պատգամավոր Լիլիթ Գալստյանի հնչեցրած բանավոր առաջարկի հիման վրա նախաձեռնությունում փոփոխություն կատարելու նպատակով գրավոր առաջարկ է ներկայացրել Կառավարությունը, որն ընդունվել է հեղինակների կողմից:
««Հայաստանի Հանրապետության դատական օրենսգիրք» սահմանադրական օրենքում փոփոխություններ և լրացումներ կատարելու մասին» և ««Հանրային ծառայության մասին» օրենքում լրացում կատարելու մասին» օրենքների նախագծերի փաթեթով առաջարկվում են մի շարք փոփոխություններ՝ ուղղված Դատավորների ընդհանուր ժողովի էթիկայի և կարգապահական հարցերի հանձնաժողովի վերափոխմանն ու գործունեության արդյունավետության բարձրացմանը:
Նախագծերի նպատակն Էթիկայի և կարգապահական հարցերի հանձնաժողովում ոչ դատավոր անդամների ձայների կշռի ու հանձնաժողովի գործունեության արդյունավետության բարձրացումն է:
ՀՀ արդարադատության նախարարի տեղակալ Տիգրան Դադունցը ներկայացրել է առաջինից երկրորդ ընթերցում ընկած ժամանակահատվածում կատարված փոփոխությունները:
Մասնավորապես, նախագծով հստակեցվել են հանձնաժողովի անդամ ընտրվելու պայմանները: Հանձնաժողովի՝ դատավոր չհանդիսացող անդամների հանրային հաշվետվողականությունը բարձրացնելու նպատակով առաջարկվում է սահմանել, որ նրանք նույնպես պարտավոր են լինելու Կոռուպցիայի կանխարգելման հանձնաժողով ներկայացնել իրենց պարտականությունները ստանձնելու, դադարեցնելու, տարեկան գույքի, եկամուտների, շահերի և ծախսերի հայտարարագրեր:
Նախագծի անցումային դրույթներում հստակեցվել է, որ ընդունվելուց և ուժի մեջ մտնելուց հետո Էթիկայի և կարգապահական հարցերի հանձնաժողովի՝ դատավոր չհանդիսացող անդամները շարունակելու են պաշտոնավարել ու նրանց նկատմամբ եւս կիրառելու են նոր օրենքով սահմանված պահանջները:
Միաժամանակ առաջարկվել է սահմանել, որ օրենքների նախագծերի փաթեթն ուժի մեջ մտնելուց հետո՝ մեկամսյա ժամկետում, հանձնաժողովի՝ դատավոր չհանդիսացող անդամները պետք է իրենց գործունեությունը համապատասխանեցնեն սույն օրինագծի պահանջներին:
Քննարկվել է «Հայաստանի Հանրապետության վարչական դատավարության օրենսգրքում լրացումներ և փոփոխություններ կատարելու մասին» և «Վարչական իրավախախտումների վերաբերյալ Հայաստանի Հանրապետության օրենսգրքում փոփոխություն և լրացում կատարելու մասինե օրենսդրական լրամշակված փաթեթը: Կատարվել են որոշակի փոփոխություններ:
ՀՀ արդարադատության նախարարի տեղակալ Տիգրան Դադունցը տեղեկացրել է, որ փաթեթի նպատակը վարչական դատարանների ծանրաբեռնվածության թեթևացումն է: Նա նշել է, որ առաջին ընթերցմամբ ընդունվելուց հետո օրենսդրական փաթեթը լրամշակվել է: ԱԺ պետական-իրավական հարցերի մշտական հանձնաժողովի դրական եզրակացությունը ներկայացրել է Ալխաս Ղազարյանը:
Հիմնական կարգավորումները՝ այստեղ:
«Բուսասանիտարիայի մասին» օրենքում և կից օրենքներում փոփոխություններ առաջարկող օրենսդրական փաթեթը քննարկման է ներկայացրել Էկոնոմիկայի նախարարի տեղակալ Տաթևիկ Սարգսյանը: Նշվել է, որ առաջինից երկրորդ ընթերցում ընկած ժամանակահատվածում բովանդակային փոփոխություններ չեն եղել:
Երկրորդ ընթերցմամբ քննարկվել են նաև «Գույքի նկատմամբ իրավունքների պետական գրանցման մասին» օրենքում առաջարկվող փոփոխությունները:
««Ֆիզիկական կուլտուրայի և սպորտի մասին» օրենքում լրացումներ կատարելու մասին» օրենքի նախագիծը եւս քննարկվել է երկրորդ ընթերցմամբ, որը ներկայացրել է ԿԳՄՍ նախարարի տեղակալ Հասմիկ Ավագյանը: Նշվել է, որ ներկայում «Ֆիզիկական կուլտուրայի և սպորտի մասին» օրենքում չկա լիազորող նորմ, որի հիմքով ՀՀ կրթության, գիտության, մշակույթի և սպորտի նախարարի հրամանով կսահմանվի սպորտի կառավարման տեղեկատվական համակարգի վարման կարգ ու հնարավորություն կընձեռվի մշակելու, ներդնելու և վարելու սպորտի ոլորտի պետական վարչական ռեգիստրներ: Այս օրենսդրական բացը լրացնելու նպատակով անհրաժեշտություն է առաջացել վերոնշյալ օրենքում կատարել լրացում և սահմանել լիազորող նորմ:
Հիմնական կարգավորումները՝ այստեղ:
«Հայաստանի Հանրապետության հարկային օրենսգրքում լրացումներ և փոփոխություններ կատարելու մասին» օրենքի նախագծի ընդունման նպատակը պետության կողմից ֆինանսավորվող ծրագրերի շրջանակներում շահութահարկ վճարողների կողմից ձեռք բերված, կառուցված, ստեղծված կամ մշակված ակտիվների դիմաց որպես փոխհատուցում ստացված նպատակային դրամական միջոցների գծով եկամտի որոշման առանձնահատուկ կանոնների վերանայումն է:
ՀՀ ֆինանսների նախարարի տեղակալ Արման Պողոսյանի ներկայացմամբ առաջինից երկրորդ ընթերցում ընկած ժամանակահատվածում ներկայացվել է առաջարկ՝ հաշվի առնելով այն հանգամանքը, որ նախագծով կարգավորվող խնդիրներն առկա են դեռևս 2021 թվականից, առաջարկվում է նախագծի անցումային դրույթներով նախատեսել, որ առաջարկվող կարգավորումները տարածվում են 2021 թվականի հունվարի 1-ից հետո ծագած իրավահարաբերությունների նկատմամբ:
Հաջորդիվ քննարկվել է ««Մաքսային կարգավորման մասին» օրենքում փոփոխություններ և լրացումներ կատարելու մասին» և ««Պետական տուրքի մասին» օրենքում լրացումներ կատարելու մասին» օրենսդրական փաթեթը, որը ներկայացրել է ՊԵԿ նախագահի տեղակալ Համլետ Սահակյանը: Նշվել է, որ առաջին ընթերցմամբ ընդունվելուց հետո բովանդակային փոփոխություններ չեն իրականացվել:
Հիմնական կարգավորումները՝ այստեղ:
ԱԺ տնտեսական հարցերի մշտական հանձնաժողովի դրական եզրակացությունը ներկայացրել է Ալեքսանդր Ավետիսյանը:
ՀՀ կառավարության հեղինակած ««Զինվորական ծառայության և զինծառայողի կարգավիճակի մասին» օրենքում փոփոխություններ և լրացում կատարելու մասին» օրենքի նախագծում առաջին ընթերցումից հետո կատարվել են խմբագրական բնութի փոփոխություններ:
ՀՀ կրթության, գիտության, մշակույթի և սպորտի նախարար Ժաննա Անդրեասյանի խոսքով փոփոխությունները միտված են եղել կարգավորումների հստակեցմանը:
Հիմնական փոփոխությունները՝ այստեղ:
Պատգամավորներ Ծովինար Վարդանյանը և Արուսյակ Մանավազյանը նոր կարգավորումներ են առաջարկում Հարկային օրենսգրքում: Առաջին ընթերցումից հետո Կառավարությունն է առաջարկներ ներկայացրել, որոնք ընդունվել են: Ծովինար Վարդանյանի առաջարկով սույն օրենքից բխող ենթաօրենսդրական նորմատիվ իրավական ակտերում անհրաժեշտ փոփոխությունները և լրացումները կընդունվեն սույն օրենքն ուժի մեջ մտնելուց հետո ոչ թե 90, այլ 60 օրացուցային օրվա ընթացքում:
«Մաքսային կարգավորման մասին» օրենքում առաջարկվող լրացումը ներկայացրել է ՊԵԿ նախագահի տեղակալ Համլետ Սահակյանը: Նախագիծը վերաբերում է ՀՀ տարածքից ելքի ուղղությամբ բեռնատար մեքենաների հերթերի կառավարման համակարգի ներդրմանը:
Առաջինից երկրորդ ընթերցում ընկած ժամանակահատվածում առաջարկված հստակեցնող փոփոխությամբ ՊԵԿ-ը կսահմանի հերթերի կառավարման համակարգը:
ՀՀ պետական եկամուտների կոմիտեի նախագահի տեղակալ Համլետ Սահակյանը քննարկման է ներկայացրել նաև Հարկային օրենսգրքում առաջարկվող փոփոխություններն ու լրացումները : Առաջին ընթերցումից հետո կատարվել են խմբագրական փոփոխություններ: Օրենքն ուժի մեջ կմտնի 2027 թվականի հունվարի մեկից:
Քննարկված հաջորդ նախաձեռնությամբ առաջարկվում է կարգավորել գնման գործընթացների կասեցման հետևանքով առաջացող խնդիրները: ««Գնումների մասին» օրենքում լրացում կատարելու մասին» և «Հայաստանի Հանրապետության քաղաքացիական դատավարության օրենսգրքում փոփոխություն և լրացումներ կատարելու մասին» օրինագծերի փաթեթը ներկայացրել է ՀՀ ֆինանսների նախարարի տեղակալ Ավագ Ավանեսյանը:
Հիմնական կարգավորումները՝ այստեղ:
Առաջին ընթերցումից հետո պատգամավորներից գրավոր առաջարկներ չեն ստացվել:
ՀՀ ներքին գործերի նախարարի տեղակալ Արմեն Ղազարյանը երկրորդ ընթերցմամբ ներկայացրել է «Ճանապարհային երթևեկության անվտանգության ապահովման մասին» օրենքում առաջարկվող լրացումները և փոփոխությունները:
Նախաձեռնությամբ առաջարկվող փոփոխությունները՝ այստեղ:
Զեկուցողի խոսքով առաջինից երկրորդ ընթերցում ընկած ժամանակահատվածում կատարվել են տեխնիկական բնույթի փոփոխություններ:
«Ռազմական գործողությունների հետևանքով ստեղծված պայմաններում և հանգամանքներում անհայտ կորած անձանց մասին» և կից ներկայացված օրենքների նախագծերի փաթեթով, մասնավորապես, առաջարկվում է սահմանել, թե ով է համարվում անհայտ կորած անձ, ինչպես նաև ամրագրել անհայտ կորած անձանց ու նրանց ընտանիքների անդամների իրավունքները:
Հիմնական փոփոխությունները՝ այստեղ:
ՀՀ արդարադատության նախարար Սրբուհի Գալյանի տեղեկացմամբ առաջինից երկրորդ ընթերցում ընկած ժամանակահատվածում իրականացվել են մի շարք տեխնիկական փոփոխություններ: Կատարվել է միայն մեկ բովանդակային փոփոխություն:
ՀՀ արդարադատության նախարար Սրբուհի Գալյանը նաև ներկայացրել է «Հայաստանի Հանրապետության դատական օրենսգիրք» սահմանադրական օրենքում և կից օրենքներում լրացումներ և փոփոխություններ նախատեսող օրենսդրական փաթեթը:
Նշվել է, որ առաջին ընթերցմամբ ընդունվելուց հետո փաթեթում կատարվել են տեխնիկական բնույթի փոփոխություններ: Նախատեսվել է նաև, որ առաջարկվող կարգավորումները կտարածվեն օրենքն ուժի մեջ մտնելուց հետո Կոռուպցիայի կանխարգելման հանձնաժողով ներկայացված բարեվարքության վերաբերյալ հարցաթերթիկների հիման վրա իրականացվող ուսումնասիրություների վրա:
Վարչական դատավարության և քաղաքացիական դատավարության օրենսգրքերում նախատեսվող փոփոխություններն ու լրացումներն ուղղված են դատարանների ծանրաբեռնվածության բեռնաթափմանը:
ՀՀ արդարադատության նախարար Սրբուհի Գալյանը տեղեկացրել է, որ առաջին ընթերցումից հետո փաթեթը լրամշակվել է, խմբագրական բնույթի փոփոխություններ են կատարվել: Ըստ այդմ՝ նվազագույն աշխատավարձի 300-ապատիկը չգերազանցող հանրային իրավական դրամական պահանջներով կայացված դատական ակտերի բողոքարկումը սահմանափակող դրույթի մասով որոշակի բացառություններով նախատեսվել է անցումային եռամսյա ժամկետ, որ վարչական մարմիններին հնարավորություն և ժամանակ տրվի՝ կանխատեսելու նշված գործերով կայացվող դատական ակտերի հետևանքները: Վերաքննիչ վարչական դատարանի զգալի բեռնաթափում նախատեսելու նպատակով որոշ բացառություններով առաջարկվել է օրենքն ուժի մեջ մտնելու դրությամբ վարչական մարմինների ներկայացրած, բայց դեռևս վարույթ չընդունված բողոքների ընդունումը մերժելու, իսկ դատաքննության փուլում գտնվող բողոքների դեպքում վերաքննիչ վարույթը կարճելու կարգավորում:
Վերաքննության փուլում որոշակի դատավարական հստակեցումներ են արվել՝ կապված մի շարք դեպքերում հայցի ապահովման ինստիտուտի կիրառման և Վերաքննիչ դատարանի որոշումների՝ ուժի մեջ մտնելու կարգավորումների հետ:
Ազգային ժողովը հերթական նիստի աշխատանքը կշարունակի մարտի 4-ին:
