Հաջորդ շաբաթ նախատեսված է Խաղաղության խորհրդի առաջին պաշտոնական նիստը, որի ժամանակ ԱՄՆ նախագահ Դոնալդ Թրամփը կհայտարարի Գազայի հատվածի վերականգնման բազմամիլիարդանոց ծրագրի մասին՝ հաղորդել է Associated Press-ը՝ հղում անելով տեղեկացված աղբյուրներին։
Ըստ պարբերականի՝ Թրամփի վարչակազմն ակնկալում է, որ փետրվարի 19-ին կայանալիք նիստին կմասնակցի առնվազն 20 երկրի պատվիրակություն։
Պատերազմից ավերված Գազայի հատվածի վերականգնման համար նախատեսվում է հատկացնել մի քանի միլիարդ դոլար, ինչպես նաև հազարավոր զինծառայողներ միջազգային կայունացման ուժերում՝ տարածքի անվտանգությունն ապահովելու համար։
Միևնույն ժամանակ, Իսրայելի վարչապետ Բենիամին Նեթանյահուի գրասենյակը հայտարարել է, որ հաջորդ շաբաթ չի վերադառնա Միացյալ Նահանգներ։
Խաղաղության խորհրդի ստեղծումը Գազայի հատվածում հակամարտությունն ավարտելու Թրամփի առաջարկած ծրագրի մի մասն է: Դրա ստեղծման մասին հայտարարվել է 2026 թվականի հունվարին՝ Դավոսում։
Աշխարհի շուրջ 60 երկրի ղեկավարներ խորհրդի հրավերներ են ստացել, ոմանք՝ որպես հիմնադիրներ: Խաղաղության խորհրդի անդամ է նաև ՀՀ վարչապետ Նիկոլ Փաշինյանը: Խորհրդի նախագահը Թրամփն է։
