Միացյալ Նահանգների նախագահ Դոնալդ Թրամփը հայտարարել է, որ ռուս-ուկրաինական պատերազմի դադարեցման և խաղաղության հաստատման գործընթացը դանդաղեցնում է ոչ թե Ռուսաստանը, այլ Ուկրաինան։
Reuters-ի հետ հարցազրույցում Սպիտակ տան ղեկավարը հայտնել է, որ Ռուսաստանի նախագահ Վլադիմիր Պուտինը պատրաստ է դադարեցնելու արդեն շուրջ չորս տարի շարունակվող պատերազմը։
«Կարծում եմ՝ նա պատրաստ է գործարքի։ Կարծում եմ՝ Ուկրաինան շատ ավելի քիչ է պատրաստ գործարք կնքելու»,- նշել է Թրամփը։
Նա չի բացառել հաջորդ շաբաթ Դավոսում կայանալիք Համաշխարհային տնտեսական ֆորումի շրջանակում Ուկրաինայի նախագահ Վոլոդիմիր Զելենսկու հետ հանդիպումը։
Ռուսաստանի արտգործնախարար Սերգեյ Լավրովն իր հերթին հայտարարել է, որ պատրաստ են շփումների Դոնալդ Թրամփի հատուկ բանագնաց Սթիվ Ուիթքոֆի և նախագահի խորհրդական ու փեսա Ջարեդ Քուշների հետ: Մոսկվա նրանց այցի մասին հայտնել էր Bloomberg-ը: Թրամփը, սակայն, նշել է, որ տեղյակ չէ նման ուղևորության մասին:
