Ուկրաինայի նախագահ Վոլոդիմիր Զելենսկին Եվրոպական խորհրդի գագաթնաժողովից հետո կայացած մամուլի ասուլիսում հայտարարել է, որ Կիևը կցանկանար ստանալ ռուսական սառեցված ակտիվները 2026 թվականի սկզբին:
Եվրոպական երկրները քննարկում են Եվրամիությունում արգելափակված շուրջ 140 միլիարդ եվրո ռուսական ակտիվներն Ուկրաինային տրամադրելու հարցը: Սակայն գագաթնաժողովի ավարտին կոնկրետ որոշում չի կայացվել:
Զելենսկու խոսքով՝ այդ հարցի շուրջ քննարկումները բարդ են եղել: Մամուլի ասուլիսում Զելենսկին նաև ասել է, որ Ուկրաինան ունի հեռահար հարվածներ հասցնելու հնարավորություններ և երբեք Ռուսաստանի տարածքի խորքում գտնվող թիրախների չի հարվածել ամերիկյան զենքով:
«Ամերիկյան զենքը կիրառվել է միայն ժամանակավորապես օկուպացված տարածքներում։ Ուկրաինան կարող է սեփական հեռահար միջոցներով հարվածներ հասցնել 150-3000 կմ հեռավորությամբ»,- ընդգծել է Զելենսկին:
Գագաթնաժողովից առաջ Զելենսկին ողջունել էր Ռուսաստանի նկատմամբ Եվրամիության և Միացյալ Նահանգների լրացուցիչ պատժամիջոցները: Նա նաև նշել էր, որ խաղաղության շուրջ բանակցություններում տարածքային զիջումների չի գնա, հավելել՝ պատրաստ է հրադադարի շուրջ բանակցությունների ցանկացած ձևաչափով:
