Գերմանիայի կանցլեր Ֆրիդրիխ Մերցը, որը Քրիստոնեա-դեմոկրատական միության (CDU) առաջնորդն է, քննարկում է Եվրահանձնաժողովի ներկայիս ղեկավար Ուրսուլա ֆոն դեր Լայենին 2027 թվականի ընտրություններում Գերմանիայի նախագահի պաշտոնում առաջադրելու հնարավորությունը, հաղորդում է Spiegel հրատարակությունը՝ հղում անելով Գերմանիայի կառավարության աղբյուրներին։
Կիրակի Գերմանիայի կառավարության բաց դռների օրը Ֆրիդրիխ Մերցն ընդունել է 2027 թվականին Գերմանիայի նախագահի պաշտոնում կին թեկնածուի հնարավորությունը։ Պարբերականը նշում է, որ Մերցին ձեռնտու կլիներ իր կուսակցությունից նախագահի պաշտոնում առաջին կնոջ նշանակումը։ Նշվում է, որ թեև Ֆոն դեր Լայենը Եվրահանձնաժողովի ղեկավարի պաշտոնում ընտրվել է 2024 թվականին և մինչև 2027 թվականը կանցնի նրա լիազորությունների միայն կեսը, Գերմանիայի նախագահի պաշտոնում նշանակվելը կարող է հետաքրքրել նրան՝ դառնալով նրա քաղաքական կարիերայի հաջող ավարտը:
Դաշնային նախագահը Գերմանիայի բարձրագույն պետական պաշտոն է։ 2017 թվականից ԳԴՀ նախագահը Ֆրանկ-Վալտեր Շտայնմայերն է։ Պետության ղեկավարին ընտրում է այդ նպատակով հատուկ հրավիրված Դաշնային ժողովը, որը բաղկացած է Բունդեսթագի անդամներից և դաշնային երկրամասերի ներկայացուցիչներից։ Պաշտոնավարման ժամկետը հինգ տարի է, վերընտրվելը թույլատրվում է միայն մեկ անգամ։ Պետության առաջին դեմքը հիմնականում կատարում է ներկայացուցչական գործառույթներ։
