Բեռլինում փետրվարի 16-ին կայացել է հեռուստաբանավեճ Բունդեսթագի արտահերթ ընտրությունում կանցլերի չորս թեկնածուի միջև, գրում է DW-ն։
Գերմանիայի պատմության մեջ առաջին անգամ կանցլերի չորս թեկնածու է մասնակցել հեռուստաբանավեճին։ Քննարկումը տևել է երկու ժամ, մասնակցել են ներկայիս կանցլեր Օլաֆ Շոլցը՝ Գերմանիայի Սոցիալ-դեմոկրատական կուսակցությունից (SPD), Ֆրիդրիխ Մերցը՝ պահպանողական կուսակցությունների դաշինքից (Քրիստոնեա-դեմոկրատական միություն/Քրիստոնեա-սոցիալական միություն (CDU/CSU)), Ալիս Վայդելը՝ ծայրահեղ աջ «Այլընտրանք Գերմանիայի համար» (AfD) և ներկայիս փոխկանցլեր, էկոնոմիկայի ու կլիմայի պաշտպանության նախարար Ռոբերտ Հաբեկը՝ «Միություն-90»/«Կանաչներ»-ից:
Լրատվականը նշում է, որ այդ հեռուստաբանավեճն առաջինն էր, որտեղ AfD-ի ղեկավար Վայդելն անձամբ հանդիպել է իր հիմնական մրցակիցներին՝ նրանց մեղադրելով «երկրում առկա բոլոր խնդիրների համար»:
Շոլցը հայտարարել է Գերմանիայի «ավանդույթի» մասին. «Մենք դասեր ենք քաղել նացիոնալ-սոցիալիզմի փորձից՝ չհամագործակցել ծայրահեղ աջերի հետ»:
Վայդելը AfD-ի և նացիոնալ-սոցիալիստների միջև համեմատություններն անվանել է «սկանդալային» ու «վիրավորական միլիոնավոր ընտրողների համար»: Մերցը խոստացել է, որ CDU/CSU-ն չի համագործակցի AfD-ի հետ՝ այն անվանելով «աջակողմյան կուսակցություն, հիմնականում՝ աջ ծայրահեղական»։
Հաբեկը խոսել է «փոխնախագահների կասկածելի ընտրական առաջարկների մասին»՝ ակնարկելով Մյունխենի անվտանգության համաժողովում Ջեյ Դի Վենսի ելույթում AfD-ի հանդեպ նրա հայտնած աջակցությունը: Մերցը նաև քննադատել է ԱՄՆ փոխնախագահին՝ AfD-ին բոյկոտելուց հրաժարվելու կոչերի համար։
Շոլցը, Մերցը և Հաբեկը նշել են, որ Միացյալ Նահանգներն ու Ռուսաստանը չպետք է Ուկրաինայում խաղաղության հաստատման համաձայնագիր մշակեն առանց Կիևի և Եվրոպայի։ Վայդելը, ընդհակառակը, ողջունել է Դոնալդ Թրամփի վարչակազմի ծրագիրն ու Կրեմլի հետ ուղիղ բանակցությունները՝ չթաքցնելով իրենց լավ հարաբերությունները Ռուսաստանի հետ:
Տնտեսության ոլորտում Շոլցը և Հաբեկը հանդես են եկել գերհարուստների հարկերի բարձրացման օգտին: Մերցը նրանց մեղադրել է «Գերմանիայի հետպատերազմյան պատմության ամենամեծ տնտեսական ճգնաժամի հարցում պատասխանատու լինելու համար»։ Վայդելը աջակցել է ջերմոցային գազերի հարկի և վերականգնվող էներգիայի մասին օրենքի ամբողջական վերացմանը:
Վկայակոչելով Forsa-ի հարցումը՝ n-tv-ն հայտնում է, որ բանավեճին հետևող հեռուստադիտողների մեծամասնությունը հաղթող է համարել Մերցին (32%), Շոլցը ստացել է 25 տոկոս աջակցություն, Վայդելն ու Հաբեկը՝ 18-ական տոկոս։
