ABŞ qüvvələri Suriyanın cənubunda, İordaniya və İraq sərhədləri yaxınlığında yerləşən Əl-Tanf hərbi bazasından çıxıb və İordaniya ərazisinə keçib. AFP bu barədə iki Suriya hərbi mənbəyinə istinadən məlumat yayıb.
Onların sözlərinə görə, qoşunların çıxarılması başa çatıb və Amerika tərəfi son 15 gün ərzində öz texnikasını geri çəkib. Bir mənbə Suriya bölmələrinin artıq hərbi bazaya yerləşdirilməyə başladığını dəqiqləşdirib.
Suriya Müdafiə Nazirliyi ordu bölmələrinin Amerika tərəfi ilə koordinasiyalı şəkildə Əl-Tanf hərbi bazasına nəzarəti ələ keçirdiyini təsdiqləyib. Məlumata görə, ABŞ ordusu koordinasiyanı İordaniyadan davam etdirmək niyyətindədir.
Bu yaxınlara qədər Amerika qüvvələri kürd qüvvələri tərəfindən idarə olunan Suriyanın şimal-şərqində, eləcə də beynəlxalq koalisiyanın İŞİD terror qruplaşmasına qarşı əməliyyatlarında əsas rol oynayan Əl-Tanf hərbi bazasında yerləşdirilib. Baza 2014-cü ildə İŞİD-ə qarşı qlobal koalisiyanın əsas əməliyyat mərkəzi kimi yaradılıb.
