Հայաստանի վարչապետ Նիկոլ Փաշինյանը տիկնոջ՝ Աննա Հակոբյանի հետ պաշտոնական այցով Չեխիայի Հանրապետությունում է: Այցի առաջին օրը Փաշինյանը հանդիպեց Չեխիայի վարչապետ Պետր Ֆիալայի հետ: Առանձնազրույցի ընթացքում կողմերն արձանագրեցին տարբեր ոլորտներում երկկողմ հարաբերությունների խորացման հնարավորությունը: Անդրադարձան նաև անվտանգային խնդիրներին:
Վարչապետ Նիկոլ Փաշինյանին Պետր Ֆիալան ընդունեց Կրամարովա ընդունելությունների տանը, որտեղ բարձրացվել են Հայաստանի և Չեխիայի դրոշները: Պաշտոնական արարողությանը հնչեցին երկու երկրների պետական օրհներգերը:
Մինչև առանձնազրույցը, Նիկոլ Փաշինյանն ու Պետր Ֆիալան կարճ զրույց ունեցան ընդունելությունների տան պատշգամբում:
ՀՀ ԵՎ ՉԵԽԻԱՅԻ ՎԱՐՉԱՊԵՏՆԵՐԻ ՀԱՄԱՏԵՂ ՀԱՅՏԱՐԱՐՈՒԹՅՈՒՆՆԵՐԸ
Վարչապետների զրույցին հաջորդեց համատեղ մամուլի ասուլիսը, ստորագրվեց դիվանագիտական հարաբերությունների հաստատման 30-ամյակին նվիրված հռչակագիրը:
Չեխիայի վարչապետն ընդգծեց՝ մտահոգված են Լեռնային Ղարաբաղում ստեղծված հումանիտար իրավիճակով, որի պատճառը Լաչինի միջանցքի շրջափակումն է, հավելեց՝ պետք է բոլոր քայլերը ձեռնարկվեն խաղաղության հասնելու համար:
Պետր Ֆիալա (Չեխիայի վարչապետ) - Ինչ վերաբերում է տարածքային ամբողջականությանն ու Ադրբեջանի և Հայաստանի միջև քննարկումներին, մենք կարևոր ենք համարում հանգամանքը, որ կնքվի խաղաղության պայմանագիր, որն ընդունելի կլինի բոլոր կողմերի համար: Վարչապետի հետ զրույցում հասկացա, որ Հայաստանը հետաքրքրված է խաղաղությունն ու կայունությունը տարածաշրջանում ամրապնդելու հեռանկարով և Հայաստանը շատ է հետաքրքրված, որ տևական լուծում գտնվի:
Նիկոլ Փաշինյանն ընդգծեց՝ Ադրբեջանը շարունակում է ուժի և ուժի սպառնալիքի կիրառման քաղաքականությունը, դրանով խախտում նոյեմբերի 9-ի եռակողմ հայտարարության դրույթները, իսկ Լաչինի միջանցքում անցակետ տեղադրելով՝ չի կատարում նաև ՄԱԿ-ի Արդարադատության միջազգային դատարանի որոշումը: Նիկոլ Փաշինյանը կարևորեց Լեռնային Ղարաբաղ և Լաչինի միջանցք միջազգային փաստահավաք առաքելության գործուղումը:
Նիկոլ Փաշինյան (ՀՀ վարչապետ) - Մենք կարծում ենք, որ միջազգային հանրությունը պետք է հստակ և հասցեական գնահատական տա: Միջազգային փաստահավաք առաքելություն ուղարկելու անհրաժեշտություն: Խաղաղությունն այլընտրանք չունի: Մենք լիարժեք ներգրավված ենք Ադրբեջանի հետ բանակցային գործընթացում՝ նպատակ ունենալով արդյունքներ գրանցել, հույս ունենք, որ կհրաժարվի ուժի և ուժի սպառնալիքի քաղաքականությունից:
Չեխիայի վարչապետը հիշեցրեց՝ նախորդ տարի հոկտեմբերի 6-ին Պրահայում տեղի ունեցավ Հայաստանի վարչապետի և Ադրբեջանի նախագահի հանդիպումը, Չեխիայի մայրաքաղաքը դարձավ այն վայրերից մեկը, որտեղ փորձ է արվել քայլ առաջ կատարել հայ-ադրբեջանական հարաբերություններում: Պետր Ֆիալան հավելեց՝ 7 չեխ փորձագետներ էլ ներգրավված են Հայաստանի և Ադրբեջանի սահմանին Եվրոպական միության քաղաքացիական առաքելության կազմում:
Պետր Ֆիալա - Մենք պատրաստ ենք մասնակցել համանման աշխատանքներին, որոնք կնպաստեն լարվածության թոթափմանը և թույլ կտան հասնել տևական խաղաղության, խաղաղ լուծման: Վարչապետ Փաշինյանն ինձ մանրամասնորեն տեղեկացրեց՝ ինչպես են ընթանում բանակցությունները: Ես յուրահատուկ հնարավորություն ունեմ այդ տեղեկությունները փոխանցել իմ եվրոպացի գործընկերներին, դրա հիման վրա կարող ենք քննարկել, թե ինչպես կարող է Եվրամիությունը նպաստել տևական խաղաղության հաստատմանը:
Չեխիայի և Եվրամիության ընդհանուր նպատակը տարածաշրջանում կայունության և տևական խաղաղության հասնելն է: Մենք կոնկրետ այս ուղղությամբ քայլեր արել ենք, Չեխիան նպաստել է մոնիթորինգի առաքելության տեղակայմանը, պատրաստ ենք մասնակցել այլ համանման աշխատանքների ևս: Վարչապետ Փաշինյանը տեղեկացրել է, թե ինչպես է տեսնում իրավիճակը, և ինչպես են ընթանում բանակցությունները:
Նիկոլ Փաշինյան - Կարծում եմ՝ սա շատ կարևոր է ինձ համար, քանի որ ես յուրահատուկ հնարավորություն ունեմ այդ տեղեկությունները և փորձառությունը փոխանցել իմ եվրոպացի գործընկերներին, ինչի հիման վրա մենք կկարողանաք դիտարկել:
ՀԱՅ-ՉԵԽԱԿԱՆ ԳՈՐԾԱԿՑՈՒԹՅԱՆ ԶԱՐԳԱՑՄԱՆ ՀԵՌԱՆԿԱՐԸ
Վարչապետներն անդրադարձան նաև Հայաստանի և Չեխիայի միջև տարբեր ոլորտներում հարաբերությունների խորացմանը: Նիկոլ Փաշինյանը նշեց՝ Պրահայում կկայանա հայ-չեխական միջկառավարական 6-րդ նիստը, որի շրջանակում նաև գործարար համաժողով կանցկացվի:
Նիկոլ Փաշինյան - ԵՄ շուկա մուտք գործելու հետ կապված կան մի շարք խնդիրներ: Կարևոր է, որ մենք մեր որակի ստանդարտները բարձրացնելու ուղղությամբ աշխատենք, չնայած հիմա էլ կան արտադրանքներ, որոնք կարող են մրցունակ լինել Չեխիայի շուկայում:
Պետր Ֆիալա - Մենք տեսնում ենք մեր գործակցությունը խորացնելու լրացուցիչ հնարավորություններ տնտեսության ոլորտում, գիտության, հետազոտությունների և կրթության բնագավառներում: Ուրախ ենք տեսնել, որ մեր գործակցությունն ավիացիայի ոլորտում շարունակում է խորանալ: Կա ծրագիր, հնարավոր է, որ արտադրվեն փոքր օդանավեր Ստեփանավան քաղաքում:
Նիկոլ Փաշինյանն օրվա ավարտին մասնակցում է CEVRO ինստիտուտի Պրահայի անդրատլանտյան հարաբերությունների կենտրոնում կազմակերպված հանդիպում-քննարկմանը: Մայիսի 5-ին վարչապետը կհանդիպի Չեխիայի Սենատի նախագահի և հայ համայնքի ներկայացուցիչների հետ:
Հեղինակ՝ Նորայր Շողիկյան
