7 iyulda Ermənistan Respublikasının iqtisadiyyat naziri Gevorq Papoyan Birləşmiş Ərəb Əmirlikləri, Küveyt, İraq və Qətərin Ermənistandakı səfirlərini və diplomatik nümayəndələrini qəbul edib. Görüşdə nazir müavinləri Arman Xocoyan və Anuşik Avetyan da iştirak ediblər. Bu barədə Ermənistan Respublikasının İqtisadiyyat Nazirliyi məlumat verib.
Nazir səfirliklərin erməni istehsalçıları və idxalçıları, böyük ticarət şəbəkələri və distribyutorları arasında işgüzar əlaqələrin gücləndirilməsində dəstəyinin vacibliyini vurğulayıb.
Körfəz ölkələri bazarlarında Ermənistan məhsullarının təmsilçiliyinin genişləndirilməsi, logistika və tranzit marşrutlarının inkişafı, B2B görüşlərinin təşkili, eləcə də ikitərəfli iqtisadi əməkdaşlığın digər sahələri müzakirə edilib.
Görüşün sonunda nazir səfirlərin suallarını cavablandırıb və ticarət-iqtisadi əlaqələrin daha da inkişaf etdirilməsi ilə bağlı təkliflərini dinləyib.
