Ermənistan baş nazirinin mətbuat katibi Nazeli Bağdasaryan Ermənistanın baş naziri Nikol Paşinyan və Azərbaycan prezidenti İlham Əliyevin iyulda Dubayda görüşməyi planlaşdırması ilə bağlı Middle East Eye-in nəşrinə münasibət bildirib.
“Armenpress”in mövzu ilə bağlı sorğusuna cavab olaraq ER baş nazirinin mətbuat katibi Nazeli Bağdasaryan qeyd edib:
“Baş nazirin səfərləri ilə bağlı lazımi məlumatlar vaxtında verilir”.
Middle East Eye öz mənbələrinə istinadən yazır ki, Birləşmiş Ərəb Əmirlikləri iki Qafqaz xalqı arasında münasibətləri yaxşılaşdırmaq səyləri çərçivəsində Ermənistan və Azərbaycan liderləri arasında görüşə ev sahibliyi etmək istəyir.
Bu kontekstdə sayt xatırladıb ki, iyunun 25-də BƏƏ-nin xarici işlər naziri Şeyx Abdullah bin Zayed Əl Nəhyanın Ermənistan xarici işlər naziri Ararat Mirzoyan və Azərbaycanın xarici işlər naziri Ceyhun Bayramovla telefon danışıqları olub.
Middle East Eye həmin telefon danışığı ilə bağlı Ermənistan Xarici İşlər Nazirliyinin yaydığı bəyanatdan aşağıdakı çıxarışı sitat gətirib:
“Nazir Mirzoyan və Şeyx Abdullah bin Zayed Əl Nəhyan Cənubi Qafqaz və Yaxın Şərqdə sülhün təmin edilməsi səyləri barədə fikir mübadiləsi aparıblar”.
