Ermənistan Xarici İşlər Nazirliyi Dağlıq Qarabağın liderləri Arkadi Qukasyan, Bako Sahakyan, Arayik Harutyunyan, Davit İşxanyan, Ruben Vardanyan və başqalarının Azərbaycan tərəfindən həbsini kəskin pisləyən bəyanat yayıb.
“Dağlıq Qarabağ nümayəndələri ilə dialoqa, ermənilərin hüquqlarına hörmət və müdafiə olunmasına, onların Dağlıq Qarabağa qayıtmasına mane olmamağa hazır olmasına, Azərbaycanın yüksək rütbəli rəsmilərinin regionda sülhün bərqərar olması ilə bağlı bəyanatlarına baxmayaraq, Azərbaycanın hüquq-mühafizə orqanları əsassız həbsləri davam etdirir.
Ermənistan Respublikası dəfələrlə, o cümlədən sentyabrın 23-də BMT Baş Assambleyasının platformasından belə hərəkətlərin istisna edilməsinə zəmanət verilməsi zərurətini qeyd edib.
Sentyabrın 28-də Ermənistan Respublikası “İrqi ayrı-seçkiliyin bütün formalarının ləğv edilməsi haqqında” Beynəlxalq Konvensiyaya uyğun olaraq “Ermənistan Azərbaycana qarşı” işi üzrə müvəqqəti tədbirin tətbiqi üçün BMT-nin Beynəlxalq Ədalət Məhkəməsinə artıq ərizə təqdim edib və Azərbaycandan Dağlıq Qarabağın indiki və ya keçmiş rəhbərliyinə və ya hərbçilərə qarşı cəza tədbirlərindən çəkinməyi tələb edib.
Ermənistan Respublikası Dağlıq Qarabağın qanunsuz həbs edilmiş nümayəndələrinin hüquqlarının müdafiəsi üçün bütün mümkün addımları atacaq”, - XİN-in bəyanatında deyilir.
