Bu gün Baş nazir Nikol Paşinyanın sədrliyi ilə ER hökumətinin növbəti iclası keçirilib.
İclasda hökumət başçısı Azərbaycanın Laçın dəhlizində qanunsuz nəzarət-buraxılış məntəqəsi qurması nəticəsində Dağlıq Qarabağda humanitar vəziyyətin gərginləşməsindən danışıb, həmçinin Azərbaycanın Dağlıq Qarabağda apardığı etnik təmizləmə siyasətinə toxunub.
Paşinyan vurğulayıb ki, Laçın dəhlizində Azərbaycan tərəfindən qeyri-qanuni nəzarət-buraxılış məntəqəsinin qurulması, Dağlıq Qarabağa elektrik enerjisi və təbii qaz nəqlinin dayandırılması və 6 aydır davam edən blokada Dağlıq Qarabağda humanitar vəziyyəti son dərəcə gərginləşdirib.
“Əgər əvvəlki ayda təbliğat məqsədilə Azərbaycan Laçın dəhlizi vasitəsilə Qırmızı Xaç və Rusiya sülhməramlıları vasitəsilə müəyyən qədər çıxış təmin edirdisə, dünəndən bu giriş də ləğv edilib və hətta Dağlıq Qarabağa zəruri ərzaqların çatdırılması dayandırılıb. Yəni xarici dünyadan Dağlıq Qarabağa ərzaq daxil olmur, təcili tibbi yardıma ehtiyacı olan vətəndaşlar Laçın dəhlizindən keçə bilmir.
Bu hərəkətlər Azərbaycanın Dağlıq Qarabağda etnik təmizləmə siyasəti aparması qorxusunu bir daha əsaslandırır. Bu vəziyyətdə söhbət qorxudan deyil, hərəkətlərin başlanğıcından gedir”,-deyə Paşinyan vurğuladı.
Baş nazir qeyd edib ki, Dağlıq Qarabağ ermənilərinin hüquq və təhlükəsizliyinin təmin edilməsi üçün zəruri olan Bakı-Stepanakert dialoqu beynəlxalq mexanizm çərçivəsində son dərəcə vacibdir və bu istiqamətdə konkret addımların atılacağına ümid etmək lazımdır.
“Eyni zamanda, nə qədər çətin olsa da, Azərbaycanla münasibətlərin normallaşması, sülhün bərqərar olması istiqamətində işimiz davamlı olmalıdır. Biz bu məsələdə ardıcıl olmalıyıq. Yaxın vaxtlarda Vaşinqtonda Ermənistan və Azərbaycan xarici işlər nazirlərinin görüşü planlaşdırılır və ümid edirəm ki, Vaşinqtonda əvvəlki görüşdə qeydə alınan müəyyən irəliləyişlər inkişaf edəcəkdir.
Onu da vurğulamaq istəyirəm ki, Ermənistan və Azərbaycan bir-birinin ərazi bütövlüyünü tanımağa razılaşdıqdan sonra sərhədin müxtəlif hissələrində gərginlik yaratmaq cəhdləri qəbuledilməz və anlaşılmazdır.
İndi növbəti addımı atmaq lazımdır: demarkasiyanın əsaslarını düzəltmək və faktiki demarkasiya və delimitasiya işlərinə başlamaq lazımdır”.
Nikol Paşinyan bir daha təsdiqləyib ki, Ermənistan ölkələrin suverenliyi, yurisdiksiyası, qarşılıqlılığı və bərabərliyi prinsipləri əsasında 9 noyabr 2020-ci il tarixli üçtərəfli bəyanatda nəzərdə tutulmuş regionun nəqliyyat və iqtisadi əlaqələrinin açılmasına hazırdır.
“Bir daha vurğulayıram ki, Ermənistan ərazisindən keçən istənilən dəhliz məntiqi qəbuledilməzdir”, - baş nazir bildirib.
