ER Xarici İşlər Nazirliyi Azərbaycan prezidentinin təhdidlərinə cavab olaraq bəyanat yayıb. Bəyanatda deyilir:
“Ermənistan Respublikasının Xarici İşlər Nazirliyi beynəlxalq ictimaiyyətin diqqətini Azərbaycan prezidenti İlham Əliyevin mayın 28-də Ermənistan Respublikasının və beynəlxalq tərəfdaşların regionda sülh, sabitlik və təhlükəsizliyin bərqərar edilməsinə yönəlmiş səylərini pozmağa yönəlmiş növbəti hərbi bəyanatlarına cəlb edir.
BMT Nizamnaməsinə, 2022-ci il oktyabrın 31-də Soçi üçtərəfli bəyanatla güc tətbiqi və ya güclə hədələmədən çəkinməyə dair yazılı öhdəliyə, digər platformalarda dəfələrlə qəbul edilmiş oxşar şifahi öhdəliklərə, eləcə də ikitərəfli münasibətlərin nizamlanması üzrə davam edən danışıqlara zidd olaraq, Azərbaycan prezidenti yenidən Ermənistan Respublikasını güc tətbiq etməklə, Dağlıq Qarabağ əhalisini isə etnik təmizləmə ilə hədələyir.
Qeyd etmək lazımdır ki, Azərbaycan rəhbərliyi əvvəllər əldə edilmiş razılaşmaları, o cümlədən 2020-ci il 9 noyabr tarixli üçtərəfli bəyanatın müddəaları, habelə beynəlxalq hüququn fundamental prinsiplərini pozmaqda və məhəl qoymamaqda davam edir. Prezident Əliyevin Azərbaycanın Laçın dəhlizinə nəzarət etməklə Dağlıq Qarabağla Ermənistan arasında əlaqəni pozması ilə bağlı sözləri buna sübutdur.
Üstəlik, eyni kontekstdə o açıq şəkildə Dağlıq Qarabağ erməniləri Laçın dəhlizinin bağlanmasından “dərs almasalar” etnik təmizləmə aparacaqları ilə hədələyir. Təəssüf ki, razılaşmaların və öhdəliklərin pozulması bununla məhdudlaşmır. Azərbaycan prezidenti beynəlxalq mexanizm çərçivəsində Dağlıq Qarabağın nümayəndələri ilə dialoqa başlamaq əvəzinə onları repressiya və cinayət təqibi ilə hədələyir.
Eyni zamanda görünür ki, Azərbaycan mövcud problemləri həll etmək deyil, “Dağlıq Qarabağda erməni olmasa, Dağlıq Qarabağ problemi olmayacaq” prinsipi ilə irəliləmək istəyir. Bu davranış həm də indiki danışıqların məntiqinə, o cümlədən nizamlanmaya vasitəçilik missiyasını həyata keçirən tərəflərin yanaşmalarına ziddir.
Azərbaycanın ərazi bütövlüyünün tanınması Dağlıq Qarabağ əhalisinə qarşı etnik təmizləmə aparmaq səlahiyyəti kimi şərh edilə bilməz. Ermənistan Respublikası beynəlxalq ictimaiyyətin, o cümlədən vasitəçilərin diqqətini ona cəlb edir ki, Azərbaycan prezidenti öz bəyanatı ilə Dağlıq Qarabağ əhalisinə qarşı növbəti təcavüzkar addıma və onları öz vətənində azad, təhlükəsiz və ləyaqətlə yaşamaq hüququndan məhrum etməyə zəmin hazırlayır.
Maraqlıdır ki, Azərbaycan prezidenti nəinki Dağlıq Qarabağ əhalisinə qarşı soyqırım təhdidləri ilə çıxış edir, həm də Ermənistanın müstəqilliyini və ərazi bütövlüyünü şübhə altına alır. Faktiki olaraq, Azərbaycan prezidenti Ermənistanın suveren ərazilərini güc yolu ilə işğal etməklə hədələməklə bütün sivil cəmiyyətə meydan oxuyur. Üstəlik, vurğulanır ki, hətta Aİ-nin müşahidə missiyasının Ermənistanla Azərbaycan arasında beynəlxalq sərhəddə olması belə Azərbaycanın Ermənistana qarşı ərazi ambisiyalarını dayandıra bilməz.
Ermənistan regionda sülhün bərqərar olması üçün seçdiyi yola sadiqdir. Təəssüf ki, Azərbaycan rəhbərliyinin aqressiv ritorikasından və hərəkətlərindən göründüyü kimi, həmin dövlət problemlərin həllini Ermənistan Respublikasının Alma-Ata Bəyannaməsi ilə müəyyən edilmiş sərhədlərlə ərazi bütövlüyünü tanımaqda və Dağlıq Qarabağ xalqının hüquq və təhlükəsizliyini təmin etməkdə deyil, təhdid və hərbi gücdən istifadə etməkdə görür.
Belə hadisələrin qarşısını almaq üçün Cənubi Qafqazda sülh və sabitlikdə maraqlı olan bütün tərəfdaşlar birmənalı qiymətləndirmələrlə çıxış etməlidirlər”.
