“ABŞ Dövlət Departamenti hesab edir ki, indi Rusiya Federasiyası ilə əməkdaşlığı gücləndirməyin vaxtı deyil. Rusiyanın Ukraynaya təcavüzü ilə bağlı kütləvi anti-Rusiya sanksiyaları fonunda Gürcüstan və Rusiya arasında birbaşa uçuşların bərpası narahatlıq doğurur”, - deyə ABŞ Dövlət Departamentinin rəsmi nümayəndəsinin müavini Vedant Patel brifinq zamanı bildirib.
Patel qeyd edib ki, əgər Rusiya və Gürcüstan arasında birbaşa reyslər olarsa, bu, təkcə ABŞ və digər Qərb ölkələrində yox, həm də Gürcüstanın hava limanlarından kənarda fəaliyyət göstərən və sanksiyalara məruz qalan təyyarələrə xidmət edən şirkətlər üçün böyük narahatlıq yaradacaq․
"Bütün Qərb birliyi Rusiya Federasiyasından uzaqlaşıb və biz hesab edirik ki, hazırda Rusiya ilə qarşılıqlı əlaqələri genişləndirməyin vaxtı deyil", - o vurğulayıb.
2023-cü il mayın 15-də məlum olub ki, Gürcüstan Rusiya ilə hava əlaqəsini bərpa edir. Tbilisi iki ölkə arasında birbaşa hava nəqliyyatından imtinanı qəbuledilməz hesab edib.
Mayın 19-da, Rusiyadan ilk təyyarənin endiyi gün Gürcüstanla Rusiya arasında hava əlaqəsinin bərpasına etiraz əlaməti olaraq Tbilisidə aksiya keçiriləcək. Bu barədə “Droa” hərəkatının lideri Elene Xoştariya məlumat verib.
