BMT İnsan Hüquqları Şurasının mandat sahibləri (müstəqil ekspertlər, xüsusi məruzəçilər) 2023-cü il yanvarın 27-də Azərbaycan hakimiyyətinə ünvanlanmış məktubu dərc ediblər, onlar indiyə qədər məktubun cavabı ala bilməyiblər.
“Armenpress” xəbər verir ki, məktub 2022-ci il sentyabrın 13-də Ermənistan Respublikasına qarşı hərbi təcavüz zamanı Azərbaycan silahlı qüvvələrinin erməni hərbi əsirləri işgəncələrə və digər qəddar rəftara məruz qoyması, erməni hərbi əsirlərin və mülki şəxslərin məhkəməsiz qətlə yetirilməsi, erməni hərbçilərinin, o cümlədən qadınların meyitlərinin şikəst edilməsi və təhqir edilməsi, o cümlədən Ermənistan hərbçilərinin lazımi tibbi yardım göstərilməməsi nəticəsində həlak olması barədədir.
BMT-nin mandat sahibləri qeyd ediblər ki, baş verənlər müharibə cinayəti kimi qiymətləndirilə bilər, çünki insan hüquqlarının və beynəlxalq humanitar hüququn kobud şəkildə pozulması, xüsusən Cenevrə Konvensiyalarının pozulması qeydə alınıb.
Onların fikrincə, Azərbaycan həmçinin Mülki və Siyasi Hüquqlar haqqında Beynəlxalq Paktın, İqtisadi, Sosial və Mədəni Hüquqlar Haqqında Beynəlxalq Paktın, İşgəncə və digər qəddar, qeyri-insani və ya ləyaqəti alçaldan rəftar və ya cəzaya qarşı Konvensiyanın, Qadınlara qarşı ayrı-seçkiliyin bütün formalarının ləğvi barədə Konvensiyanın əsas müddəalarını pozub.
Belə ki, Azərbaycan BMT-nin insan hüquqlarına dair fundamental sənədlərinin üzvü olmaqla onları kobud şəkildə pozur və BMT-nin insan hüquqlarının təmin olunmasına nəzarət edən mandat sahibləri, xüsusi məruzəçilər və müstəqil ekspertlər kimi mühüm qurumlarla əməkdaşlıq etmir. Azərbaycan da BMT qurumlarının ona verdiyi göstərişləri nəzərə almır.
Sənədi imzalayan BMT-nin insan hüquqları məsələləri üzrə mandat sahibləri bildirilmiş hallarla bağlı dərin narahatlıqlarını ifadə edərək, Azərbaycanı bu cür pozuntuların dayandırılması, onların təkrarlanmasının qarşısının alınması üçün bütün lazımi tədbirləri görməyə və cinayətlərə görə məsuliyyət daşıyan hər hansı şəxs və ya şəxslərin cəzalandırılmasını təmin etməyə çağırıblar.
Məktubda o da bildirilir ki, mandat sahibləri 2020-ci ilin noyabrında atəşkəsdən sonra hərbi əsirlərin azad edilməməsinin faktiki və hüquqi səbəbləri ilə bağlı cavab almayıblar. Azərbaycan həm də zorla itkin düşənlərin yaxınlarının taleyi ilə bağlı məlumat alması üçün hansı addımlar atdığına cavab verməyib.
