Martın 24-də ER xarici işlər naziri Ararat Mirzoyan ilə Gürcüstanın baş nazirinin müavini, xarici işlər naziri David Zalkaliani arasında telefon danışığı olub.
Həmsöhbətlər Ermənistan-Gürcüstan münasibətlərinin davamlı inkişafı, yüksək səviyyəli rəsmilərin qarşılıqlı səfərləri vasitəsilə siyasi dialoqun gücləndirilməsi ilə bağlı məsələləri müzakirə ediblər.
Telefon danışığı zamanı ER XİN rəhbəri Azərbaycanın Dağlıq Qarabağ əhalisinə psixoloji təzyiq göstərmək, ağır qış şəraitində həyati vacib infrastrukturun normal fəaliyyətinə mane olmaq üzrə hərəkətlərini həmkarına təqdim edib.
Ararat Mirzoyan Ermənistan və Azərbaycan arasında sülh sazişi üzrə danışıqların başlanması ilə bağlı erməni tərəfinin mövqeyinə toxunaraq, bu kontekstdə ATƏT-in Minsk Qrupu həmsədrlərinin vasitəçilik rolunu vurğulayıb.
Həmçinin regional və beynəlxalq təhlükəsizlik məsələləri ətrafında fikir mübadiləsi aparılıb.
