24 iyunda Ermənistan xarici işlər nazirinin müavini Vahan Kostanyan Fransanın Avropa işləri üzrə səlahiyyətli nazir Benjamin Haddad ilə telefon danışığı aparıb. Bu barədə ER XİN məlumat yayıb.
Benjamin Haddad nazir müavinini Ermənistanda yüksək demokratik standartlara uyğun keçirilən parlament seçkiləri və qələbə münasibətilə təbrik edib.
Həmsöhbətlər Ermənistan və Fransa arasında strateji tərəfdaşlığın daha da dərinləşdirilməsinə yönəlmiş birgə işləri müzakirə edərək, iki ölkə liderləri tərəfindən imzalanmış Strateji Tərəfdaşlıq haqqında Birgə Bəyannamədə nəzərdə tutulan prioritetlərin və proqramların ardıcıl olaraq həyata keçirilməsinin vacibliyini vurğulayıblar. Bu kontekstdə Ermənistan və Fransa arasında işgüzar əlaqələrin təşviq edilməsi, investisiya əməkdaşlığının genişləndirilməsi və ikitərəfli ticarət dövriyyəsinin həcminin artırılması zərurəti xüsusilə vurğulanıb.
Tərəflər həmçinin Ermənistan-Avropa Birliyi tərəfdaşlıq gündəliyi barədə fikir mübadiləsi aparıblar, Ermənistanın Avropa bazarına çıxışını genişləndirməyə yönəlmiş addımları, eləcə də regional əlaqələrin inkişafına yönəlmiş təşəbbüsləri və bu kontekstdə qeydə alınan son inkişafları müzakirə ediblər.
