Ermənistanın Baş naziri Nikol Paşinyan Avropa Parlamentindəki çıxışında regionda nəqliyyat yollarının açılması və Azərbaycanla başlayan iqtisadi və ticarət prosesləri barədə ətraflı məlumat verdi. O, Azərbaycanın qərb bölgələri ilə Naxçıvan arasında əlaqənin təmin edilməsinə toxunaraq əlavə etdi:
“İndi onu da demək istəyirəm ki, Ermənistan Respublikası bu gün mövcud infrastrukturla Kornidzor-Qoris-Yeğeqnadzor-Yerasx marşrutu vasitəsilə Azərbaycanın qərb bölgələri ilə Naxçıvan Muxtar Respublikası arasında yol əlaqəsi təmin etməyə hazırdır... Azərbaycan Ermənistan ərazisindən Naxçıvan Muxtar Respublikasına əlaqənin yaradılmasını gözlədiyi kimi, biz də Naxçıvan ərazisindən Ermənistanın cənubu ilə şimalı arasında dəmir yolu əlaqəsinin yaradılmasını gözləyirik.”
Nəqliyyat blokadasının qaldırılmasının iqtisadi nəticələrindən danışan Baş nazir ikitərəfli ticarət proseslərinin başladığını və onların müsbət təsirini də açıqladı.
"Onu da deməliyəm ki, biz Gürcüstan-Azərbaycan dəmir yolundan ixrac üçün də istifadə edəcəyik. Ümid edirəm ki, yaxın gələcəkdə Azərbaycan da Ermənistan üçün ixracat məntəqəsinə çevriləcək. Ermənistan artıq Azərbaycandan neft məhsulları idxal edir ki, bu da bazarımızda neft məhsullarının qiymətlərinin aşağı düşməsinə səbəb oldu və neft məhsulları bazarında onilliklər ərzində mövcud olan inhisarları aradan qaldırdı”.
