Birləşmiş Krallıq və Ermənistan 29 ölkədən 2500-dən çox iştirakçını bir araya gətirən “Defence Cyber Marvel 2026” hərbi təlimində iştirak edərək kibermüdafiə sahəsində əməkdaşlığı dərinləşdirməyə davam edirlər. Bu barədə Ermənistandakı Böyük Britaniya səfirliyinin Facebook səhifəsində bildirilib.
“Böyük Britaniya səfiri Aleksandra Koul və Böyük Britaniyanın müdafiə attaşesi Tomas Şorland Boll Ermənistan və Böyük Britaniya iştirakçılarının kibermüdafiə imkanlarını inkişaf etdirmək və peşəkar təcrübə mübadiləsi aparmaq üçün birgə çalışdıqları hərbi təlimi ziyarət ediblər.
Səfir Ermənistan və Böyük Britaniya iştirakçıları ilə görüşüb, hərbi təlimin gedişatını izləyib və mövcud dəyişən təhlükəsizlik mühitində kiberdayanıqlığın əhəmiyyətini müzakirə edib.
Ermənistan tərəfindən Müdafiə Nazirliyinin, İnformasiya Sistemləri Agentliyinin və Milli Təhlükəsizlik Xidmətinin nümayəndələri iştirak etdilər.
Bu cür təlimlər etibarlı tərəfdaşlığın formalaşmasına, peşəkar imkanların inkişafına və təhlükəsizliyin və dayanıqlığın gücləndirilməsinə dair ortaq öhdəliyimizə töhfə verir.
Birləşmiş Krallıq Ermənistanla müdafiə və təhlükəsizlik sahəsində inkişaf edən əməkdaşlığı yüksək qiymətləndirir”, - qeyddə deyilir.
