Məhkəmə rüşvət müqabilində Azərbaycanın maraqlarına lobbiçilik etməkdə şübhəli bilinən keçmiş Bundestaq deputatının həbsinə order verib. DW xəbər verir ki, Aksel Fişer daha sonra istintaq təcridxanasına köçürülüb. Sabiq deputat dəfələrlə məhkəmə iclaslarını buraxıb və daha əvvəl də klinikaya baş çəkib. Bununla belə, məhkəmə tərəfindən təyin edilmiş ekspertlər müəyyən ediblər ki, Fişer buraxılmış dinləmələrin ən azı ikisində iştirak edə bilərdi. Nəhayət, Bad Tsekingen xəstəxanasında nəzarətə alındı. Fişerin vəkilləri apelyasiya şikayəti veriblər.
Dekabrın 22-də keçirilən məhkəmə iclasında sabiq deputat təqsirsiz olduğunu bəyan edib. Növbəti məhkəmə yanvarın əvvəlində keçiriləcək və o, Münhenin Ştadelhaym həbsxanasındakı istintaq təcridxanasında saxlanılacaq. Əsas ittihamlardan birinin müddəti yanvarda başa çatır, lakin hüquq-mühafizə orqanlarının əməkdaşları məhkəmənin vaxtında qərar verəcəyinə əmindirlər.
Aksel Fişer 1998-2021-ci illərdə Xristian Demokratik Birlik Partiyasından Bundestaqın deputatı olub, 2010-cu ildən isə Avropa Şurası Parlament Assambleyasının üzvü olub. 2018-ci ildə AŞPA-nın bəzi üzvlərinin Avropada maraqlarını qorumaq və təbliğ etmək üçün Azərbaycan hakimiyyətindən rüşvət aldıqları üzə çıxıb. İstintaqın məlumatına görə, Fişer pul müqabilində Bakının lehinə səs verib, azərbaycanyönlü bəyanatlar verib və məxfi sənədləri ötürüb. Bu məlumatlara görə, keçmiş Bundestaq deputatı 2011-2014-cü illərdə Bakıdan 58 min avro, 2015-2016-cı illərdə isə daha 26 min 300 avro alıb.
