Avropa İnsan Hüquqları Məhkəməsi (AİHM) keçmiş Milli Televiziya və Radio Şurasının 2010-cu ildə “Obyektiv Radio”ya yayım hüququ verməkdən imtina edərkən ifadə azadlığının pozması ilə bağlı qərarını elan edib.
Avropa İnsan Hüquqları Konvensiyasının 10-cu maddəsinə əsaslanan ərizəçilər Avropa Məhkəməsi qarşısında iddia qaldırıblar ki, MTRŞ-nin qərarı onların ifadə azadlığına özbaşına müdaxilə təşkil edib. Onlar bunu “qüsurlu prosedur”, “şəffaflıq və məntiqi əsaslandırmanın” olmaması ilə əlaqələndiriblər.
Məhkəmə işinin kommunikasiyası zamanı Rəsul Cəfərov və hökumət dostca razılaşma əldə ediblər. Razılaşmaya əsasən, Cəfərov ərizəsini geri götürməyi, hökumət isə ona 3 min avro kompensasiya ödəməyi öhdəsinə götürüb.
Digər ərizəçilər, “Obyektiv Radio” və təsisçiləri Mehman Əliyev və Emin Hüseynov isə şikayətlərini davam etdiriblər. Avropa Məhkəməsi açıqladığı qərarında ərizəçilərə münasibətdə ifadə azadlığının pozuntusunu tanıyıb. Məhkəmə qərarında MTRŞ-nin prosedurları ilə bağlı problemlərini, o cümlədən əsaslandırılmış qərarın olmaması, maraqların toqquşması və ifadə azadlığına özbaşına müdaxilələrdən adekvat müdafiənin təmin olunmamasını qeyd edib.
Qərara əsasən, hökumət ərizəçilərə mənəvi zərərə görə 4500 avro, xərclərə görə 2 min avro məbləğində kompensasiya ödəməli olacaq.
Avropa Məhkəməsi bu gün həmçinin ümumilikdə 21 ərizənin yer aldığı “Ələsgərov və başqaları Azərbaycana qarşı” işi üzrə də yekun qərarını elan edib.
AİHM hələ 2022-ci ildə ərizəçilərə münasibətdə mülkiyyət hüquqlarının pozulmasına dair qərar vermişdi.Həmin vaxt ərizəçilərə ədalətli təzminatların ödənilməsinə qərar verməyə hazır olmadığını ifadə edən AİHM Azərbaycan hökumətindən yazılı təqdimat istəmişdi.
Bu gün elan edilən qərar isə ərizəçilər üçün müəyyən edilən təmzinatlarla bağlıdır.
Qərara əsasən, hökumət Ələsgərov, Qədirov, Nağıyev və Ramazanov ailəsinə 3300, Bayramovlara isə 3200 mənəvi zərər və xərclər əvəzi ödəməlidir.
