Ermənistan Respublikasının xarici işlər naziri Ararat Mirzoyan İran İslam Respublikasının yeni təyin olunmuş xarici işlər naziri Seyid Abbas Əraqçi ilə telefon danışığı aparıb. Bu barədə ER XİN məlumat yayıb.
Ararat Mirzoyan Seyid Abbas Əraqçını xarici işlər naziri vəzifəsinə təyin olunması münasibətilə təbrik edib və ona yeni mühüm missiyasında uğurlar arzulayıb.
Həmsöhbətlər Ermənistan və İran arasında ikitərəfli münasibətlərin gündəliyi ilə bağlı məsələləri müzakirə edərək, hər iki tərəfin qarşılıqlı maraq doğuran sahələrdə dostluq əlaqələrinin və güclü tərəfdaşlığın daha da möhkəmləndirilməsi istiqamətində davamlı səylər göstərməyə hazır olduqlarını vurğulayıblar. Qarşıdan gələn proqramlara toxunulub.
ER XİN rəhbəri qeyd edib ki, Ermənistan tərəfi Ermənistan Respublikasının suverenliyi və ərazi bütövlüyünün toxunulmazlığı ilə bağlı İran Respublikasının qəti mövqeyini yüksək qiymətləndirir.
